Nuummi innuttaasunut nalunaarut

Sullittakkat maannakkorpiaq Nuummi imermik pilersorneqartut misigivaat imeq allatut tipeqartoq. Tamanna piffissami ingerlareersumi silap kianneranik pissuteqarpoq. Nukissiorfiit erngup tipeqarneranik ippinnartoqarnera aaqqinniarsarivaat, Nakkutilliisutut oqartussaasut ilisimatitsipput imeq imeqarfimmeersoq peqqissutsimut ajoqutaasinnaanngitsoq aamma nalinginnaasumik atorneqarsinnaasoq.

Augustip naajartornerani aamma septembarip aallartinnerani Nuummi assut seqinnertarpoq aamma kiattarluni. Tamatuma kingunerisaanik imermi salinneqanngitsumi uumasuaqqat tappiorannartut amerlipput, pisartoq tamanna akuttunngitsumik pisarpoq.

Itisiliineq:
Nuummi tatsimi imeqarfimmi erngup pitsaassusianik unamminartoqalersarpoq, pisut tulliuttut pingasut pigaangata:
1: Uumasuaqqat tappiorannartut tatsimi imeqarfimmi amerligaangata, tamatuma kingunerisarpaat naasut naggorissinerat, soorlu taseq naggorissaatilersorneqarsimasoq.
2: Seqerngup qinngornera sakkortugaangat.
3: Erngup kissassusiata 15 grader qummut qaangersimagaangagit, tassa piffissami sivisunerusumi.

Nukissiorfiit imeq sukuluiarneqanngitsoq imeqarfimmi salittarpaa, tulleriiaartumik:
1: Sioqqanik issingersilluni saliliineq imermi uumassusillit anginerulaartut peerniarlugit.
2: UV-mik issingersineq imermi bakteriaasinnaasut toqunniarlugit.
3: Imermik silaannarissaaneq uumassusillit peersimasut imermiittut peerniarlugit.
4: Klorimik akusineq erngup salinneqareersimasup minguitsup bakteriaqalernissaa pinngitsoorniarlugu, tamatumunnga ilaapput erngup aqqutai aamma tankit imermut salinneqareersumut minguitsumut atorneqartartut.

Nukissiorfiit erseqqissaatigissavaat, qimminik aneerussineq, tamaarsimaarneq assigisaalluni imeqarfiup tikinnissaata killeqarfiata iluani inerteqqutaammat. Taamaattumik innuttaasunut inassutigissavarput imeqarfiup tikinnissaata killeqarfiata iluani arlaannik ingerlatsisarneq killeqqullugu.