Qalipaat nunamit pisoq naviananngitsoq erngup kajorneranut pissutaavoq

Imermi imerneqartussami qalipaat sungaartoq ruujorersuarneersuuvoq saviminernik sanaanit, taakkua piffissap ingerlanerani qalipaat nunamit pisoq katagartarpaat. Qalipaat (okker) nunamit pisoq peqqissutsimut navianaateqanngilaq, kisianni imerlugu saviminersunnilaarsinnaavoq. Imeq taamatut qalipaateqaleraangat pisuugajuttarput ruujorersuit pisoqaligaangamik iluanni naqitsinerup allanngortarnera.

Nukissiorfiit ruujorersuit saviminermik sanaat pisoqalisimasut maannakkut ruujorersuarnik PE-mik sanaanik taarsersorpaat. Tamanna ajornartorsiummut iluaqutaassaaq. Ruujorersuit tamarmik taarserneqareernissaasa tungaannut erngup taamatut allaanerusumik qalipaateqalertarnerani ilaatigut Nunatsinni takussaasassaaq.