Steen Lyngep Utoqqarmiut Kangerluarsunnguanni imermit nukissiorfik takuniarpaa

Steen Lynge, Nunanut Allanut Nukissiuuteqarnermullu Naalakkersuisoq, Utoqqarmiut Kangerluarsunnguanni imermit nukissiorfimmi pissanganartumik takornariartinneqarpoq tallimanngornermi juunip ulluisa 18-ianni ingerlatsinermik suliaqartumit Kristen Ishøjimit, teknikeqarnermut pisortamit Kenneth Nylandimit aamma aningaasaqarnermut pisortamit Claus Andersen-Aagaardimit.

Steen Lyngep imermit nukissiorfimmut soqutiginnilluarpoq, Utoqqarmiut Kangerluarsunnguanni alliliinissamut pilersaarutit suut aamma susoqarnissaanut tunngasut soqutiginnilluarluni.

Aammattaaq tatsimut imeqarfimmut alakkaatitsisoqarpoq, tassannga imermit nukissiorfiup innaallagissamik nioqqutissiornermut kaavittorsui pilersorneqartarput. Tassani erseqqilluinnarpoq imeq ukiuni kingullerni malunnaateqarluartumik annikillisimasoq. Tatsimut imeqarluartumut, sermersuarmit imermit immerneqartuaannartumut, sullorsualioraanni 18 kilometerisut isorartutigisumik imermit nukissiorfik siunissamut isumannaarneqassaaq.

Utoqqarmiut Kangerluarsunnguanni 1993-imili imermit nukissiorfeqalermalli Nuummi innuttaasut nukissiamik ataavartumik pilersorneqalerput. Ullumikkut Nukissiorfiup Nuummi nukissiap nioqqutigisartagaata tamakkiisup 99 %-ia Utoqqarmiut Kangerluarsunnguanni kaavittorsuarneersuuvoq.

Inissiarpassuit aamma illoqarfiup immikkoortua nutaaq, taamatullu nuuttartut amerliartortut, eqqarsaatigalugit pisariaqalissaaq Utoqqarmiut Kangerluarsunnguanni imermit nukissiorfimmik alliliinissaq.

Alliliinerup kingunerissavaa innuttaasut tamarmik aamma inuussutissarsiortut nukissiamik ataavartumit pilersorneqaannarnissaat, kiisalu illut uuliatortumik kissarsuutillit aammattaaq nukissiamut ataavartumut attavilersorneqarsinnaanissaat innaallagissamit kiassaanermut qaminneqarsinnaasumut attavilernerisigut. Taamaaliornikkut aningaasat malunnaateqarluartut uuliamik eqqussuinermut sipaarneqassapput avatangiisinut aamma nunatta aningaasaqarneranut iluaqutaasumik.