Suliffimmi praktikkertoq Lisa inuulluaqqusivoq

Sapaatip akunnera kingulleq tamaat Nukissiorfiit Nuummi qullersaqarfimmi Lisa suliffimmi praktikkertorivaa. Lisa 14-nik ukioqarpoq Nuuk International Friskolemilu atuartuulluni. Ilinniagasserineq nuannaraa meeqqallu atuarfianni fagini ukua nuannarinerpaallugit: Tyskisut, Tuluttut kiisalu Nipilersorneq. Inersimasunngoruni maskinmesterinngorsuppoq isiginnaartitsisartorluunniit.

”Ilikkagarpassuaqarpunga, immikkoortortaqarfinni HR-imi, Pisiortortuni, Projektilerisut allaffianni kiisalu Aqutsisut Allattoqarfianniillunga. Sapaatip akunnera maani nuanneqaaq pissanganaqalunilu pisiortortuni, projektini aqutsinermilu ilikkagaqarfiulluarsinnaammat. Agguaanerit, qinnuteqaatit, ussassaarut Radiofjeldimilu ledningit pillugit projektimi ikiuullungalu suliaqarpunga. Nukissiorfinni sapaatip akunnera nuanneqaaq” Lisa allappoq.

Eqqarsaatigisimaviuk ilinniarnerit naammassigukku suna suliarissanerlugu? Illit Nukissiorfinni suliffeqarfimmi ulloq qanoq ingerlasarnersoq misigisaqarfigisinnaavat aamma suliassat suliarineqarneranni peqataasinnaavutit, tamakkua illit misigisaqarfigisinnaavatit aamma ilinnut iluaqutaasinnaapput ilinniakkamik ingerlatsilernissannut ingerlariaqqinnissavit tungaanut. Meeqqat atuarfianni atuartutut uagutsinni praktikkeruit, taava suliatigut sammisani arlalippassuarni soqutigisatit misilittarsinnaavatit. Suliffeqarfinni anginersanut ilaavugut nuna tamakkerlugu immikkoortortaqarfeqarluta. Suliffimmi praktikkerneq pillugu qanorlu qinnuteqarsinnaanerlutit uani paasisaqarnerugit..