Eqalugaarsuit namminneq anorisaateqalerput

Nukissiamik mingutsitsinngitsumik ineriartortitsinermut atatillugu Nukissiorfiit Eqalugaarsunni anorisaammik nutaarluinnarmik nappaapput.

Nunaqarfinni suliassanik suleqatigiittartut ullut quliinnaat atorlugit anorisaat napparpaat.
Ilaatigut suliamut ilaapput toqqavissaanik kuisineq taassumalu suliarineqarnera sivisunerpaajuvoq. Akerlianik anorisaatip ikkussuunneqarnera taamaallaat ullormik ataatsimik sivisussuseqarpoq.

Anorisaat napparneqartoq 6 kW-mik sarfaliorsinnaavoq sananeqarporlu anori sakkortooq 70 m/s-mik sakkortussusilik akiorsinnaallugu.
Anorisaammik misileraanerit siulliit ingerlanneqareerput sarfaliorlunilu aallartereerpoq anori taamaallaat 2,5 m/s-mik sakkortussuseqartoq.

Tamatuma saniatigut Nukissiorfiit siorna nunaqarfimmi Eqalugaarsunni nutaarluinnarmik innaallagissiorfiliorput batteriinik aamma seqerngup qinnguaanik katersuisartunik atortulikkamik.

Pilersaarutigineqarpoq ukiap ingerlanerani Ammassivimmi anorisaammik anginerusumik nappaasoqarnissaa, taanna 15 kW angullugu sarfaliorsinnaassaaq.

Nukissiorfiit mingutsitsinngitsumut nuukkiartornermik ineriartortitsitsinerat aasap naanissaata tungaanut ingerlanneqassaaq.