Pilersuineq meeqqanit isigalugu

Nukissiorfiit akuttunngitsumik aamma ajorinngilluinnarlugu meeqqat atuarfiini atuartut pulaartissallugit, namminneq kissaateqarpata suliffeqarfitsinnut pulaarniarlutik. Kisianni aatsaat siullerpaamik pulaartoqarneq filmiliarineqarpoq.

Meeqqat atuarfiini atuartut ataatsimut isigalugit assut alapernaaffigisarpaat innaallagissamik, imermik aamma kiassaanermik pilersuineq pillugu tusagaqarnissartik. Ilaasa aammattaaq ataavartumik nukissiornermik suliaqarnerput pillugu tusarusuttarlutik, kisianni atuartut sisamat Qaqortumi Tasersuup Atuarfiani 8.B-meersut immikkut ipput.

Atuartut tassaapput Najannguaq, Camilla, Ivalo aamma Nauja, taakkua uagut assut tupatsilluta takkupput videoliartik tunniukkiartorlugu, taamaaliorput Qaqortumi imeqarfimmut pulaarsimanerminut qujassutitut.

Atuartut takkua sisamat pulaarnissartik sioqqullugu nunarsuarmi anguniakkat 17-init normu 6 qitiutissimavaat, tassa Afrikap ilaani innuttaasut ilaat imermik amigaateqarmata. Taamaaliornerminni normu 6.3 nassaarivaat (anguniakkavut.gl, aaqq.) taassuma qulequtaraa “Erngup pitsaassusaata pitsanngorsarnissaa aamma imikut pitsaanerusumik atorneqarnissaa”.

Misissuinermik ingerlannerani soqutigilerpaat Nukissiorfiit qanoq innuttaasunik imermik pilersuinerata paasiniarnissaa.

Nukissiorfiit Najannguaq, Camilla, Ivalo aamma Nauja suliannut kusanartumut qutsavigaat, taanna nuannaarluta ilissinnut ingerlateqqipparput (filmi kalaallisut oqaasertaqarpoq danskisut allagartalersugaalluni):

Video isiginnaaruk