Sap. ak. 43-mi Nuummi Nukissiorfiit ukiumoortumik pisartumut ”The Arctic Remote Energy Networks Academy”-mut (ARENA) inissaliivoq. Pisoqarfiusoq tassaavoq silap pissusiani issittumi inunnut najugaqartunut aamma sulisuusunut ilisimasanik paarlaateqatigiinnissamut kattuffik, tassanilu nukissatigut tunngavigisat atajuartut aqqutigalugit pilersuineq immikkut sammisarineqarpoq. Ukiormanna peqataasut aggerfigaat Alaska, Canada, Svalbard, Island aamma Kalaallit Nunaat. Nuummut tikinnertik sioqqullugu aallartitat Canadami Iqalunni pisussat aallartissimavaat.
Killeqarfiit qaangerlugit ilisimasanik paarlaateqatigiinneq
Sapaatip akunnerani pisoqarnera assut eqiterussaavoq, tamannalu Nuummi najugaqarnermut qaaqqusisumit Niels Erik Hagelqvistimit siulersorneqarpoq. Tunisassiornermut ikiorsiisarfimmit Lars Schütt, Asger Dall, Mads Sørensen, Palu Enoksen aamma Esben Madsen peqatigalugit Nukissiorfiit aaqqissuussiffiunera saqqummiuppaat, tassanilu nukissamik tunisassiornitsinni erngup nukinganik, innaallagissamik, kiassarnermik, aamma seqerngup qaamarnganik tigooraassutit ineriartortinnerinik, kiisalu anorimit nukissamik suliaqarnerput saqqummiunneqarpoq.
Pisoqarnera aamma Kitsissunut (Telegrafø’mut) takornariartitsinermik ilaqarpoq, tassanilu Tusass’ip seqerngup qaamarnganik tigooraassutinik, varmepumpinik, batteriinut toqqortiterisarnernik allarpassuarnillu pilersaarusiornermut aamma ineriartortitsinermut tunngasunut ingeniøri, Thomas Ravnshøj-Davidsen, Tusass’imeersoq paasisitsisuulluni.
Tamatuma kingornatigut Kangerluarsorutsip eqqaani Polar Oil’imut takornariarluni angalaarneq nanginneqarpoq, tamaanilu Kalaallit Nunaanni uuliamik pigisaqarfinni annerpaat ilaannut, tassungalu atasutut uuliamik toqqorsivusumut takornariartitsisoqarpoq. Aallartitat Nukissiorfiit erngup nukinganik nukissiorfiani, Utoqqarmiut Kangerluarsunnguanni (Buksefjordenimi) Jónas Birgisson Syderbømit takornariartitaanerannik angalaneq naggaserpaat.
Nunap aamma kultureqarnerit assigiiffigisaat
Ukiormanna ARENA-mi pisoqarfiusumi peqataasut ilaat tassaavoq professor Michael Ross, ulluinnarni Yokon Universitymi Industrial Research Charitut sulisuusoq. Taanna malillugu ARENA-mi katersuunneq assorsuaq iluaqutaavoq, tassunga atatillugu oqarmat: “Issittup avatangiisuani nukissiornermik aamma pilersuinermik allat suliaqartuusut naapinnerat assorsuaq ilinniarfissaavoq, tamaani ingammik ataatsimoorussatut anguniakkanik tikitaqarnissaq pillugu suleqatigiinneq, aammalu nunat aamma kultureqarnerit akornanni assigiissutsit ukiumi pisoqarfimmi tassani iluanaarutitsialaasimammata.”
ARENA tassaavoq pisoqarfiusartoq takkuttuartartoq, taannalu nunat issittormiut taakku akornanni ilisimasanik paarlaateqatigiinnernik qularnaareqataavoq, aammalu killeqarfiit qaangerlugit ataatsimoorfimmik nukittorsaalluni.
