Naalakkersuisut atorfimmut inuttassarsiuineq peqqissaartumik ingerlatereerlugu Johan Danielsen 1. januaari 2025 aallarnerfigalugu Nukissiorfinni nukissiornermut pisortatut (CEO) atorfinitsinneqassasoq aalajangerput. Johan Danielsen Nukissiorfinni nukissiornermut pisortaagallartutut atorfeqarsimavoq.
Suliatigut nukittooq piginnaanilillu, Nukissiorfinni oqimaaqatigiissumik ingerlalersitsisussaq
Johan Danielsen Uummannami peroriartorsimavoq, aammalu Ilisimatusarfimmiit bach.scient.adm.-itut ilinniarsimalluni. Johan Danielsen aningaasaqarnermik aqutsinermi siuttuunermilu nukittuunik piginnaaneqarfeqarpoq, kiisalu Kalaallit Nunaanni pilersuinermik suliassaqarfimmi annertuunik misilittagaqarluni. Misilittakkat piginnaaneqarfiillu taakku ilaatigut Tusass-imi naatsorsuuserinermut pisortatut, Air Greenlandimi financial controlleritut kingullermillu Nukissiorfinni pisortaagallartutut atorfeqarnermini inerisarsimavai. Johan Danielsenip Nukissiorfinni nukissiornermut pisortaagallartutut atorfeqarnermini Nukissiorfiit periusissiaata nutaap ilusilersorneqarnerani pingaarutilittut inissisimasimavoq.
”Naalakkersuisut Johan Danielsenip atorfinitsinneqarnera nuannaarutigaat. Naatsorsuutigaara Johan iliuuseqallaqqissutsini pimoorussininilu, kiisalu ataqqinnilluni aqutseriaaseqarnini atorlugit Kalaallit Nunaat tamakkerlugu pilersuinermik isumannaatsumik pilersitsiumaartoq. Johanip atorfinitsinneqarneranut peqatigitillugu qularinngilara, nukissiornermut pisortamik, Kalaallit Nuaanni pilersuinermik suliassaqarfiup ineriartortinneqarnerani suliat ingerlaavarnissaannik qulakkeerisinnaasumik, aammalu Nukissiorfinni oqimaaqatigiinnermik pilersitsisinnaasumik atorfinitsitsilluta. Johanip suleqatigilluarneqarnerata ingerlaqqinnissaanut qilanaarpunga”, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.
Naalakkersuisut piumasaqarnerisigut aammalu Qitiusumik Allaffeqarfimmi sulisunik atorfinitsitsisarneq aamma suliffinni imminnut ingerlattuni pisortat pillugit kaajallaasitaq naapertorlugu ataatsimiititaliamik naliliisussamik pilersitsisoqarpoq, taassumalu qinnuteqartut naliliiffigai.
Ataatsimiititaliap naliliisussap inassuteqarneratigut Naalakkersuisut aalajangerput, Johan Danielsen atorfinitsinneqassasoq.
