Thorbjørn Hansen Nukissiorfinni siornagut suleqatitut ilisimaneqarluartoq uteqqippoq, nunap immikkoortuani Upernavimmi nunaqarfilerisuni aqutsisutut atorfimmi nutaami juunip aallaqqaataani atorfinikkami. Upernavik nunatsinni illoqarfinni tamani nunaqarfeqarnersaavoq.
Thorbjørn Hansen Upernavimmiuusoq KTI-mi skibsmontøritut 2022-mi allagartartaarsimavoq. Nukissiorfinni siornatigut ingerlatsinermi sulisutut aallartissimavoq kingornalu Upernavimmi nunaqarfinnut formanditut 2023-miit atorfeqarsimalluni. Uummannap innaallagissiorfiani formanditut ukiumi ataatsimi 2025-p tungaanut aamma sulisimavoq. Tamatuma kingorna ukiumi ilivitsumi Nukissiorfiit qimassimalaariarlugit maanna tassa uterpoq.
Nukissiorfiit qimavissinnaanngilaa
Thorbjørnip Nukissiorfinnut uternissani erinigisimavaa:
-Qinnuteqarpunga suleqatiginikuusama Nukissiorfinnut uteqqullunga kaammattornikuummanga. Aamma Nukissiorfiit suliffittut kiisalu suleqatiginikuusakka maqaasiuaannarnikuugakkit. Taamaammat illoqarfigisanni nunaqarfilerisuni aqutsisunngornera nuannaarutigisorujussuuara. Assut pissanganarpoq, atorfimmut nutaamut naqqaniik ineriartortitseqataallungalu nunaqafinni atugassarititaasunik pitsanngorsaaqataasussanngorama. Thorbjørn oqarpoq.
Thorbjørnip nunqarfilerisuni aqutsisutut Upernavimmi nunaqarfittaanilu tamani innallagissiorfinni sulisut innaallagisserisullu qanimut suleqatigissavai. Upernaviup nunaqarfittai qulingiluat tassaapput: Nuussuaq, Kullorsuaq, Innaarsuit, Tasiusaq, Aappilattoq, Upernavik Kujalleq, Naajaat, Kangersuatsiaq aamma Nutaarmiut. Upernavimmi nunaqarfiinilu Nukissiorfiit katillugit 20-it missaannik sulisoqarput.
