Ullumi, ull. 1. maj sulisartut nunani tamalaani ulluat nalliussineqarpoq, tamannalu 1889-imili sulisartuunermi pisinnaatitaaffinnik sorsuutigisaqarnermut sulisartut kattuffiisa ukiumoortumik malunnartitsiffigisarpaat. Nukissiorfiit iluani sulisutsinnik pikkorissunik, ulluni tamani innaallagissamik, imermik kiassarnermillu pilersuinitta pissusissamisut ingerlatarineranik qularnaarisunik sammisaqartitsivigalugu atorparput.
Erngup nukinganik soqutiginnittoq
Ilagaat Jens Bjerge (Jens uani suleqatinilu Poul assiminni talerperliuvoq), Nuummi ingerlatsinermik sulialik. Ulluni suliffigisamini Utoqqarmiut Kangerluarsunnguanni erngup nukinganik nukissiorfiup ingerlatarinera suliaqarfigiuarpaa, taamatullu taassuma 1993-imi sananeqarlunilu ingerlanneqalerneraniilli iliorsimavoq.
Taamanikkut soqutiginninnerup misigisaqarusussuseqarnerullu akulerunnerisigut erngup nukinganik nukissiorfiup nutaatut sananeqarsimasup taassuma tungaanut saatsissimavaa:
”Ajugaaffigisassat nutaat takorloorpakka, taamaattumillu nunatsinni erngup nukinganik nukissiorfimmik siullerpaamik ingerlatarinerata aallartinneraniilli peqataasinnaatitaaneq assorsuaq pissanganartuusimavoq. Sulilu taamaappoq. Ullumikkut Nuummi annertunerusumik nukissamik atuinermik pissuteqartumik maskiinanik annertunermik aserfallatsaaliugassaqarpoq, nukissiorfilli assupilussuaq attassisinnaassuseqarluinnartuuvoq. Tamanna tupinnarluinnarpoq,” Jens, maannakkut erngup nukinganik nukissiorfimmi ukiut 34-it sinnerlugit atorfeqarsimasoq oqaluttuarpoq.
Ilisimasanik katersivik akunnitsinniittoq
1988-imi Jens Nukissiorfiit iluani maskinistitut atorfinitsitaavoq, ukiullu marluk qaangiunneranni taamanikkut Nuuk Anlæg’imut (Nuummi Ingerlatsivimmut) attaveqarfeqalerpoq, taannalu tassaavoq 1989-imi septembarimi erngup nukinganik nukissiorfiorfiliortuusoq. Erngup nukinganik nukissiorfik ingerlanneqalermat ingerlatsinermi sulisutut atorfinitsitaavoq. Taamaalilluni erngup nukinga aamma issittumi pilersuineq pineqaleraangata Jens tassaavoq ilisimasanik katersivik akunnitsinniittoq.
Ulluni suliffiusuni suliai tassaapput sarfap aqqutaanik, turbinenik aamma sarfaliuutinik aserfallatsaaliuinerit, taamaattumillu nukissiorfimmi ajugaaffigisassat takkuttarsinnaasut ilisimasaqarfigai, tamakkulu pillugit ima oqaluttuarpoq:
”Nalinginnaasut saniatigut pisoqartarnera pissanganalaartartuuvoq, tassaappata napparutini ajoqusernerit, immikkut ittumik aserfallatsaaliugassaqarnerit, allarluinnaalluunniit. Assersuutigalugit ukiuni ataasiakkaani tamani nukissap aqqutaanik, powerlinjemik qaqqat qaarsortaanni misissuiartortarpugut, tassanilu sarfap aqqutaani, imaluunniit napparutini arlaannik ajoqusertoqarsimannginnera qulakkeertarparput. Tassaavoq timi atorlugu suliassaq ilungersornartoq, assut pisuttariaqarfiusartoq, aammali nuannarisartuuara, tassaavormi suliffik assissaqanngitsoq, pinngortitami avatangiisunik pinnersorsuarnik pilik.”
Jensip, aammalu suleqatitsialai 400-it sinnillit atorfeqartillugit ingerlatsivitsinnik paarsisuunerat, aammalu nunamut tamarmut pilersuinikkut qaffasissumik isumannaassuseqarnermik qulakkeerisartuunerat Nukissiorfiit iluani assut tulluusimaarutigaavut.
Tamassinnut ullorsiorluakutsoorisi!
