Uani sapaatip akunnerani Nukissiorfiit qullersaqarfia ’EU-Greenland Week’-imut, Bruxellesimi ingerlanneqartumut Naalakkersuisut aamma NunaGreen peqatigalugit ataatsimeersuaqataapput. Ulloq ataaseq nukissat sammineqarput, tassanilu Nukissiorfimmi pisortaq, Johan Danielsen, aamma teknikkimut pisortaq, Filip Sivertsen, ataatsimeersuarnermi Kalaallit Nunaanni nukissiuutinik tunisassiornerput pillugu saqqummiussipput, tamannalu erngup nukissiuutaannik annertuumik ingerlanneqarluni – nukissiuutinik tunisassiornitta 70%-isa missaat erngup nukissiuutaanniit tunisassiaammata. Taassuma saniatigut Johan ilaatigut Thomas Ravnshøj-Davidsen NunaGreenimeersoq peqatigalugu Kalaallit Nunaanni datacenterissat pillugit oqallinneq ingerlappaat, tamanna ineriartortinissamut suleqatigiinnermi immikkoortortanut ilaatinneqarmat.
Kalaallit Nunaannut soqutiginninneq annertooq nunamilu ineriartortitassatut periarfissaasinnaasut misigalugit nuanneqaaq. Saqqummiussinermi oqallinnernilu arlaqartut siunissami Kalaallit Nunaata minguitsumik ingerlanissaanut isumalluuteqarnerput pillugu oqallinnerupput, isumalluutilli aningaasaliiffigineqaqqaartariaqartuullutik. Tamanna Nukissiorfiit suliassatut ingerlateqqissallugu qilanaaraa.
