Louise Geisler Nukissiorfiit Nuummi qullersaqarfiani Akiitsulerinermut immikkoortortaqarfimmi aqutsisuuvoq.
Nukissiuuteqarnerup iluani sulisutut Grønlands Energitjeneste taamani GTO-mik ateqarallarmat misiginikuuaa, kingornalu Nuna-tek’inngornera maannalu Nukissiorfiit ilanngullugu.
Koldingimiit Ilulissanut
Koldingimi Handelshøjskolemi marloqiusamik oqaaseqartartutut (tuluttut/tyskisut) ilinniareernermi kingorna Louise, uinilu Qeqertarsuup Tunuani Qasigiannguaneersoq, ernertillu ilangalugu ulloq 6. juuli 1979-imi Ilulissanut nuussimapput:
- 1. juuli 1979-imi GTO-mi (Grønlands Tekniske Organisation) atorfinippunga, tassani allatsitut aallartillunga. Kingorna allaffimmiutut ikiortinngorpunga – allaffimmiunngorlunga – taavalu kingusinnerusukkut kontorfuldmægtiginngorlunga. 2000-imi Ilulissani EGT-imi allaffimmi aqutsisunngorpunga, Louise oqaluttuarpoq.
Nunatsinni suliffeqarfittut allatuulli Nukissiorfinni aaqqissuussinikkut allannguuteqartarlutalu suliffeqarfimmi allanngortiterisarpugut, marsi 2014-imilu Nukissiorfiit immikkoortortaqalerpoq. Louise oqaluttuarpoq:
- Avannaani immikkoortoqarfimmi allaffimmi aqutsisutut atorfimmiit Ilulissani, Uummannami, Upernavimmi Qaanaamilu allaffissornikkut sulisunut aqutsisutut ingerlareerlunga, kingorna immikkoortortaq Qeqertarsuup Tunua allanngortinneqarmat, Aasianni, Qasigiannguani, Qeqertarsuarmi Ilulissanilu allaffissornikkut sulisunut allaffimmi aqutsisunngorpunga.
Allannguisoqaqqimmallu tassani Ilulissat namminerisaminik immikkoortoqarfinngormat tassani Louise Geisler allaffimmi aqutsisunngorpoq. Ilulissanulli killiffeqaannanngilaq.
Nuummi ernutaa nutsuivoq
2020-mi Louise, nammineq oqarneratut; ukiut 41-t ”Diskobugtinnguami nalissaqanngitsumik kusanangaartumi” najugaqareerluni ilaquttanilu Nuummut nuupput. 2016-imi siullermik ernutartaarpugut, maqaasinerlu annertusivallaaqimmat Nuummut nuunnissatsinnut aalajangerluta. Louise qullersaqarfiup Naatsorsuuserinermut immikkoortortaani siunnersortitut atorfeqalerpoq, Akiitsulerinermut immikkoortortami aqutsisunngornissami tungaanut. Louise:
– Ima iluatsitsitigivunga, Ilulissanut angerlarsernerujussuaq nalaateqqaruttorlugu Akiligassiisarnermut immikkoortortami nuannernerpaanik suleqatitaarpunga, tigulluarneqangaaramalu ulloq manna tikillugu tassani suli suleqatigaakka.
Aqutsisutut naleqartitat
Louise Nukissiorfiit Akiitsulerinermut immikkoortortaani sulinermini pingaartitaminik tunngavittut naleqartitaqarpoq:
- Naleqartitanni pingaarnersaapput, akuersaartuuneq, ataqqinninneq, akisussaaneq, suleqatigiinneq, ilisimasanik avitseqateqarneq, ukkatiginninneq, eqaatsumik suleriuseqarneq kiisalu anguniakkat pillugit ingerlaavartumik sulissutiginnittarneq. Akiligassiisarnermi immikkoortortami Nukissiorfinnut akiligassallit annaasaqaataannginnissaat sulissutigiuaannarparput. Pingasunik oqaasinnaaqarpunga: ”Qraa – assut” - ”Imminut tatigalutit – malussarinnerit ilanngullugu – naatsorsuutigisanniit sapinnginneroqaatit” – ”Ilinniarnissamut kingusinaanngisaannarpugut”, Louise qungujuumivoq.
Suliffiup avataani ilaquttat pinngortitarlu
Louise sulitinnani nuannersumut nukissaminik aallertarpoq:
- Ilulissani qimmeqarnikuuvugut nunaqarfimmullu qanittumut aamma Akinnakkooriarluta nunap timaatigut qimussertarnikuulluta. Nuummi pinngortitamiinneq, arpanneq takisuumillu pisuttuarneq, ilaquttat angalaaqatigalugit piniaqatigalugillu nuannareqaara. Pinngortitaq – tarnigissaatitsialaavoq.
Ukiut 47-it kingulliit naligiissitaaneq
1979-imi Louisep GTO-mi aallartinneraniit ullumikkumut suiaassutsimut tunngatillugu naligiissitaaneq pitsaasumik siuariartorsimasoq Louise naliliivoq:
- 1979-imiit ullumikkumut arnanut sulisunut ataqqinninneq pitsanngoriaateqangaatsiarsimavoq. Taamani GTO-mi arnat sulisut kaffiliortuusarnikuupput ingeniørinullu rundstykkinik sassaalliisarnissaat pissusissamisuuinnartutut isigisaasimalluni. Qujanartumilli piffissap ingerlanerani periuseq tamanna pissusissamisuuinnartutut isigisaasoq tammariartupallannikuuvoq, Louise qungujulluni naggasiivoq.
