Ulloq 1. januar 2026, 2027 aammalu 2028 atuutilersussanik innaallagissamut imermullu akigititanik iluarsiinerit
Innaallagissamut imermullu akigititat ukiuni pingasuni tulliuttuni alliartortunngorlugit iluarsiivigineqassasut Naalakkersuisut aaliangiussimavaat. Tamatumunnga tunngavigineqarpoq Nukissiorfiit aningaasaqarnikkut inissisimanerat, matumani pineqarlutik innaallaagiamik imermillu tuniniaanermi isertitarisat ingerlatsinermut, aserfallatsaaliuinernut pinngitsooranilu aningaasaliiffigisanut matussusernissaanut naammanngimmata. Taamaattoqarnerata kingunerisimavaa attaveqaasersuutinut pingaarutilinnut aningaasaliinissamut kinguaattooqqalerneq, taamatumalu pisariaqartilersimavaa ukiuni arlalinni akitigut qaffaasariaqalerneq. Taamaattumik qularnaatsumik pilersuisinnaaneq qulakkeerniarlugu aammalu qamittoortoqarsinnaanerata minnerpaaffimmiitinneqarnissaa anguniarlugu pingaaruteqarluinnarpoq Nukissiorfiit aningaasaqarnikkut oqimaaqatigiissumik inissisimanissaat.
Akinik qaffaanerit pingaarnertut ima isikkoqarput
Innaallagiamut imermullu akigititat qaffanneqarneri imatut kinguneqassapput:
- Ulloq 1. januar 2026-miit 7 pct.-imik qaffaaneq
- Ulloq 1. januar 2027-miit 7 pct.-imik qaffaaneq
- Ulloq 1. januar 2028-miit 7 pct.-imik qaffaaneq
Akigitinneqartunik iluarsiinermi siunertarineqarpoq nuna tamakkerlugu isasuujuitsumik qularnaatsumillu innaallagiamik imermillu pilersuinerup qulakkeerneqarnissaa. Akinik qaaffaanikkut Nukissiorfiit aningaasaliinissanut pisariaqartunut kinguaattoqarnerata aaqqiivineqarnissaanut periarfissinneqassaaq taamaalilluni aningaasaqarneq siumut nalorninanngitsumik ersarinnerulerniassammat.
Qaffaanermut tunngaviusoq
Nukissiorfiit akigititaminut tunngatillugu akigitat tungaatigut sinneqartoornani amigartooruteqaraniluunniit ingerlanermik tunngaveqarluni ingerlanneqarpoq. Tassa imaappoq suliffeqarfik piginnittuminut sinneqartooruteqartitseqqusaananilu aamma amigartooruteqaqqusaanngitsoq. Ukiuni kingulliunerusuni innaallagiaq imerlu tunisassiornermi aningaasartuutit ataallugit akeqartinneqarluni tunisassiarineqartarsimavoq, tamatumalu kingunerisimavaa aningaasaqarnikkut oqimaaqatigiinngitsumik inissimalerneq.
Naammattumik iluanaaruteqartannginneq imatut kinguneqarsimavoq:
- tunisassiornermi atortut, illuutit pilersuinermilu attaveqaatinik aserfallatsaaliinerit amigartut
- aningaasaleeqqittaqattaarnissamik pisariaqartitsineq annertusiartortoq
- ingerlatsinikkut akornuteqalernissaq annertunerulerlunilu siunissami qamittoortalernissaq
Unammilligassat tamakku piareersimaffiginiarlugit piffissami sivisunerusumi akigititanik qaffaanissaq pisariaqarpoq.
Akinik qaffaanermut atatillugu Nukissiuuteqarnermut pisortaq Johan Danielsen ima oqaaseqaateqarpoq:
”Uannut manna taamaallaat kisitsisinut akigititanullu tunnganngilaq – akisussaassuseqarnermulli tunngavoq. Suliffeqarfittut inuiaqatigiinnut annertuummik akisussaaffeqarpugut, nammineerlungalu inuttut pisussaaffittut isigaara Kalaallit Nunaanni kikkulluunniit tamarmik aamma siunissami patajaatsumik innaallagiamik, imermik kiassarnermillu pilersorneqarnissaasa qulakkeernissaa. Massakkut akinik aaqqiinerput uatsinnut sullitatsinnullu avissaanganerulernissaq siunertaanngilaq, attaaveqaasersuutilli inuiaqatigiit tamarmik pinngitsoorsinnaanngisaat paarilluarnissaat pineqarpoq.
Nalunngilara akinik allannguineq ernumalersitsinnaasoq, tamannalu ilungersunartutut isigaarput. Kisianni allannguinissamut alloriartariaqarpugut, matumanilu qamittooqattaarnerit patajaatsumillu pilersuisinnaanerup attatiinnarnissaanut qulakkeerniarlugu aningaasaliinissat pisariaqavissut kinguarteqattaarnissaat periarfissaajunnaartariaqarpoq. Taammattumik akigititatsinnik iluarsiinerit uku tassaapput kinguaariinnut takkuttussanut unammilligassanik annertuunik aningaasaqarnikkullu nammatassiinnginnissatsinnut alloriarnerit pingaarutillit.”
Ullut tamarluinnaasa pitsaasumik sunniuteqarluartumillu akissaajaatissanillu eqqumaffiginneqissaarluta pilersuinerput ingerlanniarlugu suliniartuarpugut, sapinngisarpullu tamaat atuisutut sullitatta patajaatsumik ingerlatsilluta attatiinnarneqarsinnaasumillu pilersorneqarnissaat qulakkeerniartuarparput – ullumikkut siunissarlu eqqarsaatigalugit”
Ukiuni tulliuttuni akigititassat
| INNAALLAGIAQ |
| 1. januar 2026: 2,00 kr./kWh |
| 1. januar 2027: 2,14 kr./kWh |
| 1. januar 2028: 2,29 kr./kWh |
| IMEQ |
| 1. januar 2026: 24,30 kr./m³ |
| 1. januar 2027: 26,00 kr./m³ |
| 1. januar 2028: 27,82 kr./m³ |
Appasinnerusumik akiligassaqarnissamut siunnersuutit
Inoqutigiinni akikinnerusumik atuilernissamut siunnersuutit uani nassaarikkit: Appasinnerusumik akiligassaqarnissamut siunnersuutit - Nukissiorfiit
Akitigut iluarsiineq akiligassiissutigineqartumi
Akigititanik nalimmassaalluni qaffaaneq ulloq 1. januar 2026-miit atuutilissaaq. Allannguutit atuisut februaarip qaammataanut tunngasumik akiligassiissutigineqartussami takusinnaassavaat, tassanilu januarip qaammataani atuisimaneq pillugu naatsorsuineq takuneqarsinnaassaaq.
Taamatuttaaq Nukissiorfiit Atuisunut Sullissiviani akiligassiissut nammineerluni misissorneqarsinnaavoq uani Kundeportal.
Annertunerusumik paasisaqarusukkaanni uunga mailikkut allagaqarluni saaffiginnittoqarsinnaavoq:
