Nukissiorfiit septembarip aallartinnerani Svalbardimi issittumi nukissiuutit pillugit ataatsimiinnermut qaaqqusaammat eqqartorneqartunut ilaavoq. Ataatsimiinneq ”ZEESA”-mik atserneqarsimavoq, ”Zero Emission Energy Systems for the Arctic”-imullu naalisaataalluni.
Uani teknikikkut immikkut siunnersorterput, Niels Erik Hagelqvist oqaluttuarpoq, Nukissiorfiit suut Kalaallit Nunaanni seqerngup anorillu nukiinik misilittagaqarfigineraat. Uani ataaseq ilinniutissatut pingaarnerusimavoq, seqerngup anorillu nukissiuutit issittumi atukkanut nalimmassarneqartariaqartut, Kalaallit Nunaanni anori silallu sakkortusinnaaneri peqqutaallutik akiuussinnaasussaammata. Taamaattumik Nukissiorfiit nioqqusiortut qanimut suleqatigalugit seqerngup anorillu nukiinik inerisaasimapput.
Nunarsuarmi nioqqut misiligarneqareeraluartoq, qularnarpoq Kalaallit Nunaanni atorneqarsinnaassasoq. Silaannaap issinnera peqqutaalluni Nukissiorfiit seqerngup anorillu nukissiuutaannik unamminartorsiorsimapput. Uani tunniutiinnannginnissaq pingaaruteqarpoq. Nukissiorfiimmi isumaqarsimagaluarpoq, ikkussorneqareerluni ingerlaannaq aallartinneqarsinnaassasoq, paasinarvorli sivisujaartumik ineriartortitseqqaarlunilu pitsanngorsaaqqaartariaqarluni. Nioqqusiortulli imaluunniit Nukissiorfiit tunniutiinnarsimanngillat, ullumikkummi seqerngup anorillu nukissiuutai issittumi ingerlasinnaanngorlugit pitsanngorsaaffigineqareerlutillu nukittunerulersimammata.
Innuttaasunik peqataatitsineq pingaaruteqartoq
Allamik aamma eqqartuisoqarpoq, tassa innuttaasunit mingutsitsinngitsumut ikaarsaariartorneq qanoq isumaqarfigineqarnersoq. Mingutsitsinngitsumut ikaarsaariartornermi unamminartoqarsinnaavoq, assersuutigalugu innuttaasut nipiliortoqarnissaanut isikkivimmilluunniit ajoquserneqarnissaannut ernummateqartut. Matumannga Niels Erik ersarissaavoq, nukissiorfimmik sanaartulinnginnermi innuttaasunik peqataatitsinissaq paasititsiinissarlu pingaaruteqartoq. Tamanna innuttaasunik ataatsimiisitsinikkut anguneqarsinnaavoq, tassani innuttaasut ernummateqassagunik ernummatitik tusaaneqartut, suliamillu pilersaarusiornermi isumassarsiornerit isumasioqatigiinnerlu ingerlanneqarlutik.
Kalaallit Nunaanni seqerngup anorillu nukissiuutaannik milittakkat pillugit soqutiginninneq annertuvoq, annertungaarmat Niels Erik aamma Svalbardip Folkehøjskoliani saqqummiinissaminut aggersagaavoq, saqqummiinermi qanoq mingutsitsinngitsumut ikaarsaariartornersugut qanorlu sammineqartumut ilinniartitaaneq avitseqatigiittarnerillu pillugit periarfissaqarnersoq pillugit apeqquteqartoqarluni.
Misilittakkagut pillugit saqqummiinissarput nuannarisuaannarparput, taamaasiornikkut aamma allanik assigusunik nukissiuutinik mingutsitsinnginnissamullu ikaarsaariartornermik suliaqartunik ilisimasatigut avitseqartarnissarput nukittorsartarmagu.
