Tallimanngornermi juunip ulluisa 23-anni Nukissiorfiit nuimasumit pulaarteqarput, Nunalerinermut, Imminut Pilersornermut, Nukissiuutinut Avatangiisinullu Naalakkersuisoq, Kalistat Lund, ukiumoortumik nunalerineq pillugu ataatsimiinnermi peqataammat.
Kalistat Lundip kissaatigisimavaa Nukissiorfiit hybridimut atortuat nunaqarfimmi Eqalugaarsunni kiisalu Qorlortorsuarmi imermit nukissiorfik alakkarniarlugit. Ilagai nammineq naalakkersuisoqarfimminit aamma Kommune Kujallermi atorfillit, borgmester Stine Egede kommunaldirektørilu Tine Pars angalanermi peqataallutittaaq.
Angalaneq Eqalugaarsunni aallartippoq, tamaani fabriki alakkarneqarluni, tassani qeqqussat nioqqutissiarineqarnissaat aallartisarneqarluni. Tamatuma kingornatigut Nukissiorfiit nunap immikkoortuani pisortaata Lars Hoffmeyerip hybridimik atortoq anorisaatitalik, batteriinut toqqorsivittalik, solcellertalik aamma generatorimut atortortalik takutippaa.
- Angalasut atortumut alapernaatsorujussuupput, qanorlu sanasimaneranut pikkuginnilluinnarput, Lars Hoffmeyer oqaluttuarpoq.
Eqalugaarsunni takuniaasitsereernermi Qorlortorsuarmut angalanertik nangippaat, angalaqatigiit imermit nukissiorfik alakkarmassuk, taanna pinngortitami alianaatsumiippoq tamatumalu kingornatigut takuaat sullorsuaq erngup kuuffissaanik pilerneqarsimasoq Alluitsup Kangerluata qinnguaniittoq.
Tamaani siullermik imermit nukissiorfimmi takuniaatinneqarput, tamatumalu kingornatigut sullorsuaq erngup kuuffissaanik pilerneqarsimasoq sapusiarlu, angalaqataasut ilaat sapusiami angalaartinneqarlutik qanoq sananeqarsimanera takutillugu.
- Apeqquterpassuarnik apeqquteqarput. Ingammik imermit nukissiap allilerneqarsinnaaneranut periarfissat apeqqutit amerlallutik. Angalaqatigiit nukissiorfik torragisorujussuuaat, nunap immikkoortuani pisortaq oqaluttuarpoq.
Tamaani angalareeramik savaateqarfimmut kiisalu Nanortalimmut angallanneqarput.
