Tasiilami erngup nukinganik innaallagissiorfiup piffissani innaallagissamik atuinerup annertunerpaaffiani illoqarfiup pisariaqartitai kisimi matussusersinnaanngilai. Taamaattumik erngup nukinganik innaallagissiorneq ullumikkut dieselimik innaallagissiornermik tapertaqartinneqartareerpoq, innaallagissamik pilersuinerup ataatsimut ingerlanneqarneranut ilaatillugu.
KNR-ip Tasiilami erngup nukinganik innaallagissiorfik pillugu saqqummiussaanut atatillugu Nukissiorfiit erseqqissaatigissavaat unammilligassaq pingaarnerpaamik atuinerup annertunerpaaffiinut tunngasuummat – tassa piffissanut innaallagissamik atuinerup immikkut annertunerpaaffigisartagaanut.
Tasiilami erngup nukinganik innaallagissiorfik innaallagissamik pilersuinermi suli qitiusumik inissisimavoq. Piffissani innaallagissamik atuinerup annertunerpaaffiani, pingaartumik ukiukkut, erngup nukinganik innaallagissiorneq dieselimik innaallagissiornermik tapertaqartinneqartariaqartarpoq.
Tamanna ullumikkut innaallagissamik pilersuinerup ataatsimut ingerlanneqarneranut ilaareerpoq.
Tatsimut imeq qanoq annertutigisumik kuunnersoq pinngortitami silap pissusaanik silallu qanoq inneranik aalajangerneqartarpoq, taamaattumik Nukissiorfiit tamanna aqussinnaanngilaat. Tamanna piffissani assigiinngitsuni erngup nukinganik qanoq annertutigisumik innaallagissiortoqarsinnaaneranut sunniuteqartarpoq.
– Erngup nukinganik innaallagissiorfiup pisinnaasaasa Tasiilamilu innaallagissamik pilersuinerup ataatsimut qanoq ingerlanneqarnerata immikkoortinneqarnissaat pingaaruteqarpoq. Innaallagissamik atuineq immikkut annertugaangat allatigut innaallagissiornermik tapertaqartittareerparput. Tamanna innuttaasut suliffeqarfiillu patajaatsumik innaallagissamik pilersorneqarnissaat qulakkeerniarlugu sulinitsinnut ilaavoq, nukissiutitigut pisortaq Johan Danielsen oqarpoq.
Ineriartorneq qanimut malinnaaffigaarput
Tasiilaq ineriartorpoq, inissiallu nutaat, suliffeqarfiit sammisallu allat innaallagissamik pisariaqartitsinerup annertusiartornissaanut kinguneqarsinnaapput.
Nukissiorfiit taamaattumik innaallagissamik atuinerup ineriartornera, atuisut nutaat attavilersorneqarnerat kiisalu siunissami innaallagissiornissamut pisinnaasat qanoq annertutigisumik pisariaqartinneqarnissaat ingerlaavartumik malinnaaffigaat.
Peqatigisaanik siunissami nukissiuutinik pilersuineq pillugu misissuinerit ingerlanneqarput, ilaatigut innaallagissiornissamut pisinnaasat sillimmatitullu pilersuineq ilanngullugit.
Misissuinerit inernerisa siunissami pisariaqartitat aningaasaliissutaasinnaasullu nalilersorneqarnissaannut pitsaanerusumik tunngavissiissarnissaat siunertaavoq.
Ullumikkut innaallagissamik pilersuineq erngup nukinganik dieselimillu innaallagissiornikkut isumagineqarsinnaagaluartoq, Nukissiorfiit ilisimaarivaat innaallagissamik atuinerup annertusiartornera siunissami innaallagissiornissamut pisinnaasat annertusarneqarnissaannik aningaasaliissuteqarnissamillu pisariaqartitsilersinnaasoq.
– Ullumikkut pissutsit kisiisa isiginagit Tasiilaq ukiuni aggersuni qanoq ineriartussanersoq aamma eqqarsaatigisariaqarparput. Akisussaaffigaarput siumut eqqarsarluta piffissaagallartillugu pilersaarusiornissaq, taamaalilluta pilersuinerup ineriartorneq malinnaaffigisinnaassallugu, Johan Danielsen oqarpoq.
Nukissiuutit ataavartut pilersuinerullu isumannaatsuunera
Nukissiorfiit nukissiuutinik ataavartunik sapinngisamik pitsaanerpaamik atuinissaq anguniarlugu sulipput, peqatigisaanillu pilersuinerup patajaatsuunissaa qulakkeerniarlugu.
– Soorunami erngup nukinganik sapinngisamik annertunerpaamik atuinissarput kissaatigaarput. Kisianni suliassatta pingaarnerpaartaraat innuttaasut suliffeqarfiillu patajaatsumik innaallagissamik pilersorneqarnissaat. Taamaattumik nukissiuutinut ataavartunut ikaarsaariarneq pilersuinerullu isumannaatsuunera ataatsimoortillugit ingerlanneqartariaqarput, Johan Danielsen naggasiivoq.
Nukissiorfiit Tasiilami ineriartorneq ingerlaavartumik malinnaaffigissavaat, siunissamilu suliniutissat pisariaqassanersut innaallagissamik atuineq piviusoq aammalu siunissami naatsorsuutigineqartoq tunngavigalugit nalilersorneqassallutik.
Kalaallit Nunaata sinneranisulli Nukissiorfiit Tasiilami aamma ajornartoornermi sillimmatitullu pilersuinissamut periarfissaqarput. Taamaattumik pissutsit pilersuiffinnut allanut sanilliullugit immikkut ittuunngillat, innuttaasullu pilersorneqarnerisa isumannaatsuunerat maannakkut sunnerneqanngilaq.
