Else Magnussen Qeqertarsuarmi najugaqarpoq, Nukissiorfiillu Qeqertarsuup Tunuani immikkoortortaani allaffimmi aqutsisutut atorfeqarluni. Nukissiorfinni atorfillit tunniusimasut akornanni sivisunerpaamik sulisuuvoq.
Else Magnussenip ukiuni 38-ni Nukissiorfinni sulinermini Qeqertarsuup Tunuani immikkoortortami sullitai katillugit illoqarfiit sisamaapput nunaqarfiillu arfineq-marluullutik.Â
- Taamani ulloq 1. februaari 1988-imi Nukissiorfinni sulilerpunga, Nuna-tek’imik ateqarallarmat. Taamanikkut sulilerama, byggeleder-rinik suleqateqarpugut, taakkulu suliaat, aamma allaqqissaartarlugit, sorpassuarnillu ikiortarlugit. 1989-ip aamma 1990-ip akornanni kisimi sulinngiffeqarnikuuvunga. Sulinngiffeqareernerma kingorna uteqqippunga, maannamullu suli maaniillunga.
Kalaallit Nunaanni Namminersornerullutik Oqartussat GTO (Grønlands tekniske organisation) 1987-imi tigummassuk aqqa Nuna-Tek-inngorpoq (Nunatsinni Teknikkikut Ingerlatsivik). 1991-ip kingorna Nuna-tek-iujunnaarluni ateqalerpoq Nukissiorfiit.
Skrivemaskiinamiit pappilianiillu qarasaasianut internetimullu
Else Magnussen 1979-imi Ikast Handelshøjskole-mi allaffimmiutut ilinniakkaminik naammassinnippoq. Taamani interneti oqarasuaatillu angallattakkat suli atulinngikkallarmata, piffissarli maannamut sukkasoorujummik ima ingerlasimatigivoq, tassani Else-p Nukissiorfinni allaffissornikkut ingerlatsinera pappiliamiit cyberspace-nngorsimalluni:
- Taamani aallartikkama Qeqertarsuarmi sulisut assannik ataatsimik kisinneqarsinnaapput, immikkoortunilu illoqarfiit tamarmik allaffeqarlutik. Ineriartornerli ilutigalugu ikiliartornikuuvugut, maannakkullu kisima immikkoortoq tamaat interneti ikiortigalugu sullippara. Oqaluttuarpoq nangillunilu:
- Akiligassat, akissarsiassat, siumoornerit il. il. tamarmik 1988-imi skrivemaskiinamik pappiliamut allanneqartarput. Pappiliarsornerujussuaq annertunikooqaaq. Ullumikkut internetikkut ataqatigiissaarutit atorlugit tamarmi ingerlanneqarpoq. Aallartikkama takorloorsinnaanikuunngisaannarpara siunissami ullumikkut ineriartorneq ilutigalugu atortorissaarutit tassunga killikkumaartut.
Angalanerpassuit online-kkut ataatsimiinnernik taarseqartut
Else oqaluttuarpoq, teknikikkut ineriartornermut malinnaalluarsimalluni:
- Nukissiorfimmi kiffartuussinermut tunngatillugu ataqatigiissaarutitigut pingasoriarluni alloriarnerit misiginikuuakka. Aallaqqaammut ataatsimiigiarluta angalasorujuusarnikuuvugut, ullumikkulli suna tamarmi online-kkut ingerlanneqartarpoq, taamaasilluta ataatsimiinnissatsinnut ungasissumut angalanissarput pisariaarulluni.
Else aamma oqaluttuarpoq, Nukissiorfinni sulisutut nuannersunik misigisarpassuaqartarsimalluni.
- Taamaattumik suli sulivunga. Nukissiorfinni atorfeqarninni misigisakka amerlanerit nuannersuupput, taamaattumik sulinera nuannareqaara. Else naggasiivoq.
