Nukissiorfiit Kommuneqarfik Sermersoorlu Nuummi immiigasuartarfinnik ikkussuipput

Maanna biilinit innaallagissamik ingerlateqartut hybridbiilillu 725-nik amerlanerusunut, ullumikkut Nuummi aqqusinerni ingerlaartut piginnittuinut nuannersumik nutaarsiassaqalerpoq. Nukissiorfiimmi Kommuneqarfik Sermersooq peqatigalugu immiigasuartaatinik tallimanik nutaanik, innaallagissamik mingutsitsinani pilersitamik batteriinut immiinissamut piareersimasussanik kikkunnilluunniit atorneqarsinnaasunik ikkussipput.

Manna tikillugu Nuummi ataasiinnarmik immiigasuartaateqarpoq, tamannalu piumanninnerup annertusiartorneranut sanilliullugu naammanngilaq, tamanilli atorneqarsinnaasunik immiigasuarfinnit peqalerneratigut naammassisinnaasat annertunerulissapput.

Tunngaviusumik piffissami sivitsortumi biilit innaallagissamik ingerlateqartut hybridbiilillu immerneqartarnerannut atatillugu periusissiamik ersarissumik nutaamillu attaveqaasiornissaq pisariaqartinneqarsimavoq, maannalu Nukissiorfiit Kommuneqarfik peqatigalugu akisussaaffimmik tigusipput.

Maanna batteriit nalunaaquttat akunnerini arlalinni immerneqarnerat utaqqineqartariaaruppoq, immiigasuartaatimmi nutaat nalunaaquttap akunnerata affaata missaani immiisinnaapput.

Borgmesteri qiimmassimaartoq

Immiigasuartaatillu nutaat Kommuneqarfik Sermersuup borgmesterianik Charlotte Ludvigsenimik qiimmatsitsipput, taassumalu attaveqaatit nutaat Nukissiorfinnillu peqateqarneq illoqarfiit pingaarnersaata mingutsitsinnginnissaanik anguniagaqarneranut allariarneruvoq pingaarutilik.

– Kommunalbestyrelsimi siunertamut aningaasanik immikkoortitsinitsigut Nuummi biilerpassuarnik innaallagissamik ingerlateqartunut hybridbiilerpassuarnullu immiigasuartaateqalernissaanik qulakkeerinneqataanerput tulluusimaarutigaara. Tamanna mingutsitsinngitsunut ikaarsaarsaarnermut alloriarneruvoq pingaarutilik. Klima nunarsuarmi anguniakkanut periusissiatsinni qitiulluinnartumik inissisimavoq, taamaammallu kommunimi aamma biilivut arlallit innaallagissamik ingerlatilinnik taarsersorpavut. Neriuppunga immiigasuartaatit nutaat amerlanerusut biilinut avatangiisinut mingutsitsinngitsunut biiliminnik taarsiinissamut piumassuseqalertissagaat – Charlotte Ludvigsen oqarpoq.

Immiigasuartaatit nutaat marluk atulereerput, taakkulu Brugseni Nataliap Brugseni Qinngorpullu silataanni inissisimapput. Immiigasuartaatini taakkunani biilit marluk ataatsikkut immerneqarsinnaapput.

Tamatuma saniatigut Nuuk Centerip silataani immiigasuartaatit pingasut sapaatip akunnerani uani atoriaannanngussapput. Nuuk Centerimi ataatsimik immiissuteqareerpoq, taamaammallu maanna biilit qulingiluat ataatsikkut immerneqarsinnaanngussapput. Peqatigiinnermi kommuni immiissutinut atortuutinut aningaasalersueqataasuuvoq, Nukissiorfiillu immiissutinik ingerlatsisuullunilu isumaginnittuuvoq.

Pilersaarut naapertorlugu ukioq manna kingusinnerusukkut immiigasuartaat alla ataaseq ivertinneqassaaq, upernaallu ingerlanerani Nukissiorfiit aamma Nuummi inuinnarnut suliffeqarfinnullu immiigasuartaatinik attartornissamut neqerooruteqartalissaaq. Immissutit issimut akiuussinnaanngorlugit sanaajupput, biilillu suunerat apeqqutaatillugu batteriit nalunaaquttap akunnerini marlunnit tallimanut immerneqarsinnaapput.

Nukissiorfiit akisussaaffimmik tigusivoq

Nukissiorfiit immiissutinik nutaanik siaruarterinermi siuttuunerat nalaatsornerinnaanngilaq. Nukissiamik ingammillu innaallagissamik mingutsitsinani pilersinneqartumik immikkut ilisimasalittut, suliffeqarfiup suliassamik tigusinera pissusissamisoorpoq, nukissiuuteqarnermut pisortaq Kaspar Mondrup oqarpoq.

– Biilit innaallagissamik ingerlatillit siunissami biilerineqartussaapput, Kommuneqarfik Sermersuumillu suleqateqarluarnitsigut immiigasuartaatit nutaat atorlugit biilit innaallagissamik ingerlateqartut hybridbiilillu toqqarnissaat ajornaannerulersillugulu pilerinarnerulersissinnaavarput. Tamanna Kalaallit Nunaata CO2-mik aniatitsinerata appartinnissaanut pingaaruteqarpoq,- Kaspar Mondrup oqarpoq, taassumalu aamma kommunit allat Nukissiorfinnik taamatut peqateqarnissamut piumassuseqarnissaat neriuutigaa.

Nuummi immiigasuartaatini nutaani tallimani tamani biilit marluk ataatsikkut immerneqarsinnaapput, biilinillu innaallagissamik ingerlateqartunik piginnittut nittartakkakkut quppernermut (nukissalik.gl) nalunaarnikkut, Nukissiorfiit immiivinnik nutaanik ”Nukissalinnik” atuinissamut periarfissaqalissapput. Upernaap ingerlanerani smartphonesnut App aamma saqqummiunneqassaaq. Tassunga ilanngunnikkut pisariitsumik immiissutit atorneqanngitsut sumiinnerat takuneqarsinnaavoq, tassanilu aamma atuinermut akiliisoqarsinnaavoq.

Taamattaaq aamma Nukissiorfiit allallu billinik innaallagissamik ingerlateqartunik hybridbiilinillu niuertunik peqateqarnerit pissanganartut piviusunngoqqajarput, taakkulu siunissami aaqqissutit pisariitsut atornissaat suli pilerinarnerulersissavaat. Qaammatit aggersut ingerlanerani taakku suuneri Nukissiorfiit saqqummiutissavaat.

Paasissutissanik erseqqinnerusunik pissarsinissami, Nukissiuuteqarnermullu pisortamik Kaspar Mondrupimik apersuinissamik isumaqatigiissuteqarnissamut Sune Tougaard suto@nukissiorfiit.gl-kkut attaveqarfigineqassaaq

Paasissutissanik erseqqinnerusunik pissarsinissami, borgmester Charlotte Ludvigsenimillu apersuinissamik isumaqatigiissuteqarnissami kommunikation@sermersooq.gl attaveqarfigineqassaaq.