Nuummi erngup aqqutaanik annertuumik serlersaartoqartoq

Nukissiorfiit utaqqiisaasumik erngup aqqutaanik putut 14-init serlersaarnerup kingunerisimagai pasivaat. Erngup aqqutaa Nuup illoqarfiata pilersorneqarneranut ilaavoq

Nukissiorfiit ingerlatsinermi sulisuisa marlunngornermi ullaap tungaani takusaat nuanninngilluinnarpoq, paasivaat tatsimit imeqarfimmiit utaqqiisaasumik erngup aqqutaani Nuup illoqarfianut ingerlasumi imeq kuussuataartoq. Tassami takusaat tassaapput putut 14-init.
Utaqqiisaasumik erngup aqqutaa pilersinneqarpoq Nuup illoqarfiani imermit imerneqartussami persaqutaasartut akiorniarlugit, soorlu 2020-mi tamanna arlaleriarluni malugineqartoq imeq allatut mamassuseqarluni aamma tipeqarluni.
- Assorsuaq serlersaartoqarsimanera uggornarpoq. Suna tamaat iliuserisinnaasarput atorlugu sullittakkavut imermit imerneqartussamik minguitsumik pilersorniarpavut, Kenneth Nyland, teknikeqarnermut pisortaq oqarpoq.

Erseqqissaatigaa Nukissiorfinnut immikkut ittumik unamminartoq pilersartoq serlersaartoqarneranik pisoqaraangat, tamatumalu ajornerpaajuguni kingunerisinnaagaa sumiiffimmi pineqartumik imermik pilersuinermik ajutoortitsineq.
- Sakkortuumik inuit qinnuigaakka Nukissiorfiit atortuinik sissuertaqqullugit. Ajornerpaamik pisoqarpat pilersuinermik qulakkeerinninnermik ajoqusiisoqarsinnaavoq. Tamatuma saniatigut sulisorpassuit aningaasat atortariaqartarpavut serlersaartoqarsimaneranut iluarsaassinermut, sulisut aningaasat allani pitsaanerusumik atorneqarsinnaagaluartut, Kenneth Nyland oqarpoq.

Sapaatit akunneranni kingullermi aammattaaq Nukissiorfiit misigaat erngup aqqutaata putuneqarsimanera, taamanikkut sulisut putunik ilaartuipput iluatsitsillutik.
Serlersaarneq maannakkorpiaq pilersuinermut sunniuteqanngilaq, kisianni tamanna ingerlaannarpat imermik imerneqartussamik ajunngitsumik pilersuinermi unamminartoqalersinnaavoq.