Ilulissani imermit nukissiorneq qulinngortorsiorpoq

Ukioq maanna Paakitsumi imermit nukissiorfiup Ilulissanik pilersuineq aallartimmaguli ukiut qulit qaangiupput.

Isumaqatigiissummi allassimavoq “Paakitsumi imermit nukissiorfik Nukissiorfinnit tiguneqassaaq aatsaat innaallagissami pilersuisinnaanngorpat”.
Issuaaneq Nukissiorfiit aamma taamanikkut sanaartornermik ingerlatsisup “Istak”, Pihl og Søn-imit pigineqartup akornanni isumaqatigiissummeersuuvoq.
Istak imermit nukissiorfimmit sanaartortuuvoq kiisalu isumaqatigiissutip eqqortinneqarnera tunngavigalugu imermit nukissiorfik Nukissiorfinnut tunniunneqarpoq ulloq 30. oktobari 2012, tassa ukiut qulit matuma siornatigut.

Suliassaq siulleq tassaavoq sulisunik ilinniartitsinissaq. Tamanna islandimiut pilersuinermik ingerlavianit Landsvirkjun-imit ingerlanneqarpoq. Taamaattumik Nukissiorfiit Ilulissani sulisui ilinniartinneqarput namminneq aqutsivimminngaanniit ingerlatsinermik aqutsisinnaanngorlugit. Taamanili assut soqutiginnillutik aamma naammaginarluinnartumik suliartik suliarivaat.

Ukioq ataaseq qaangiuttoq tunniussineq atsiorneqarpoq aamma tamatumunnga atatillugu pisortatigoortumik atoqqaarfissiortitsineq ingerlanneqarpoq, taamani naalakkersuisuusoq Mette Lynge qaaqqusisoralugu.

Taamanikkulli ajunngilluinnartumik ingerlasoqarpoq. Imermit nukissiorfik inuiaqatigiinnut  dieselimik 9 million literimik eqqussinissamik sipaartitsivoq, tassa 2012-imi aallartinneqaramili  ukiumut 24.000 tons CO2 nalinganik. Allatut oqaatigalugu imermit nukissiorfiup inuiaqatigiit dieselimi 85 millionit literimik sipaartippai aamma avatangiiseq CO2-mik 226.000 tonsimik aniatitsinissaraluamik. Kalaallit Nunaanni mingutsitsinngitsumut ikaarsaariartornermut tunngatillugu iluartitsilluarnerusuuvoq. 

Imeq imermit nukissiorfimmut kuuttoq sermersuup aanneraneersoq aamma immerneqartuartunik tatsineersoq sullorsuit kilometerit arfinillit aqqutigalugit apuuttarpoq.

Ullumikkut Ilulissani inaallagissap nioqqutissiarineqartup 2/3-ia  innaallagissamik qaminneqarsinnaasumik kiassaanermut atorneqarpoq, nukissiamut atorneqartumut silami kiassuseq apeqqutaasarluni.