Cicilie Nukissiorfinni Pisortaaninngussaaq

Maanna Naalakkersuisunit aalajangiunneqarpoq Cicilie Senderovitz 1. Maaji 2022 aallarnerfigalugu Nukissiorfinni Pisortaanertut atorfinitsinneqassasoq. Avatangiisinut uumassusilerinermi pisortanilu allaffissornikkut ilinniagaqarpoq. Cicilie Senderovitz Vestforbrænding-imi isumaqatigiissuteqarnikkut pisortatut atorfimminngaanneerpoq. Tamannalu tunngavigalugu ilaatigut aqutsinermi, pilersuinikkut qulakkeerinninnermi, pitsanngorsaanermi, minguitsuutitsiniarnermi, sullitanik kiffartuussinermi kiisalu aningaasaqarnikkut aqutsinermi misilittagaqarluni.

”Naalakkersuisut Cicilie Senderovitzip atorfinitsinnera nuannaarutigaat. Naalakkersuisut aalajangiinerannut Kalaallit Nunaat tamakkerlugu pilersuinikkut patajaatsumik ingerlanissap qulakkeerneqarnissaa pingaartuusimavoq. Ciciliep angusaqarusussutsikkut piumassutsi atorlugu suliamik naammassinnissinnaanissaa naatsorsuutigaarput, aammalu pilersuinikkut suliassaqarfinni misilittagarpassuarminik atuisinnaanissaa naatsorsuutigalutigu. Ciciliep suleqatiginissaa qilanaarutigaara, neriuppungalu maanna Nukissiorfinnut aalajaatsumik ukiuni arlalissuarni atorfimmi issiasussamik Pisortaanermik nassaarluta. Tamanna suliffeqarfimmi patajaassuseq aallaavigalugu sulisut naammagisimaarinninnerannut aammalu angusaqarluarnissamut pingaaruteqarluinnartuuvoq,” taamak oqarpoq Nunalerinermut, Imminut Pilersornermut, Nukissiutinut Avatangiisinullu Naalakkersuisoq, Kalistat Lund.

Cicilie Kalaallit Nunaanni inunngorsimavoq peroriartorlunilu, maannalu Nukissiorfinni atorfininnini ilutigalugu nunatsinnut uteqqinnissaminut qilanaarpoq. 

”Nukissiornikkut suliassaqarfik, minguitsuutitsiniarneq, avatangiisit kiisalu piujuartitsinissamut atatillugu aaqqiissutit soqutigilluinnagaraakka. Taamaattumik tamanna uannut periarfissatsialaavoq –Nukissiorfinni sulisorpassuit pikkorissut peqatigalugit Kalaallit Nunaanni pitsaasumik ineriartortitseqataanissaq qilanaarivara. Kalaallit Nunaat tamakkerlugu pilersuinikkut patajaallisaanissamut suliassaqarpoq pingaarutilerujussuarmik –suliassaq taanna pimoorullugu sukataarutiginissaanut piareersimavunga. Uannut suliassat uninngaannannginnissaat pingaaruteqartuuvoq.

Sulisinnaanikkut piumassusilerujussuuvunga tunniutiinnajanangalu, taamaattumik suliat aallartinnissaat qilanaarilluinnarpara,” Cicilie Senderovitz taamatut oqarpoq.

Attaveqarfissat

Paasissutissat sukumiinerusut pissarsiarinissaannut Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi Pisortaaneq Mette Skarregaard Pedersen attavigineqarsinnaavoq oqarasuaat 529844, imaluunniit pan@nanoq.gl