Mittarfeqarfinnit til Nukissiorfinnut

Nukissiorfinnit qilanaaraarput Kangerlussuarmi, Narsarsuarmi aamma Qaarsuni pilersuinerup akissaaffigilernissaa

Ulloq 23. juuni 2022 Naalakkersuisut aalajangerput nukissiamik aamma imermik pilersuineq sumiiffinni matuma siuliani taaneqartuni Mittarfeqarfinnit Nukissiorfinnut 1. januaari 2023 aallarnerfigalugu tunniunneqassasoq.

Nukissiorfiit taamatut aalajangerneq tulluartutut aamma pissusissamisoortutut isigaat.
- Eqqorluinnarpoq innaallagissamik, imermik aamma kiassaanermik pilersuineq Nukissiorfinnit isumagineqassappat, tassami tamanna suliassarput pingaarnerpaajuvoq, teknikeqarnermut pisortaq Hans Rowedder oqarpoq

Tamatuma piviusumik kingunerissavaa siunissami atuinissamut pissussaaneq aamma ingerlatsinermut akisussaassuseqarneq Nukissiorfinniilissammat. Taamaattorli naliliutit imermik aamma nukissiamik pilersuinermut tunngasut soorlu assersuutigalugit illut aamma sanaartukkat, tamakkua Namminersorlutik Oqartussat pigiinnassavaat. Taamaattumik innuttaasut tunniussinermut atatillugu arlaannik malugisaqassanngillat.
- Pissutsit arlallit naleqqussarneqarnissaat suliaraarput inaarutaasumik tigusinissap piviusunngornissaa sioqqullugu, Hans Rowedder oqaluttuarpoq.
Suliamut tamatumunnga ilaatigut ilaapput pilersuinermut isumaqatigiissutit, illut iluini inissitsiterineq, IT-mut atortut aamma sulisut kalluarneqartut atorfeqartitaanerannut tunngasut.
- Nukissiorfinnut tulleriiaarinermi pingaarnerusimavoq Mittarfeqarfinni sulisuusimasunut toqqaannartumik eqqorneqartunut atugassarititaasut isumaginissaat. Assut pingaartipparput suleqatigiligassatta pitsaasumik aamma toqqissisimasumik periuseqarluta pineqarnissaat, Hans Rowedder oqarpoq.