Itillermiut imeqarfinnguartaarmata

Itillimi imeqarfiliorneq assersuutaalluarpoq nunaqarfimmi killilimmik isumalluuteqarfiusumi qanoq iliortoqarsinnaaneranut.

Nunaqarfimmi nutaamik imeqarfiliorneq piffissami sivikitsuinnarmi pivoq. Ukioq ataatsip matuma siornatigut, sanaartorfiusumi 2020-mi, assaaneq aallartittorlu maanna sanaartorneqareerpoq.

Soorlu allarpassuartulli nunaqarfimmi sanaartukkatulli siumut isumagisassaqaaluppoq. Assartuineq ajornakusoorsinnaasarpoq piffissamillu allannguilluni. Kisianni qujanartumik Nukissiorfiit nunaqarfinni sanaartornermik suliaqarnermik aaqqissuussinermik misilittagaqarluartuupput ilisimallugillu piffissaqarluarluni piareersarnissaq pilersaarusiornissarlu. 

Kisianni qanorluunniit piareersarsimatigigaluaraanni, taava tamatigungajak unamminartoqartuaannartarpoq. Tamanna aammattaaq uani suliami, Krügerimit montøri atortussaminit siulliulluni tikimmat.

Uggorineqaqisumik nalunaartoqarpoq atortussai piffissami suliffigisassaani tikissinnaanngitsut. Kisianni qujanartumik montørip atortut atugassai Sisimiunit attartorneqarsinnaasimapput. Pissarsinissamulli piffissaq sivisulaartoq atorneqarmat Itillimut assartornissaat nal. akunnerinik marlussunnik kinguartinneqarpoq.

Montøri Itillimut apuummat najukkami entreprenørip piareersagassaq suliarisimavaa imeqarfissap toqqavissaa aammattaaq ruujorilerineq isumagisimallugu.

Sanasup PRIESS-imeersoq sanaartugassanik pisiffigisaq peqatigalugu illutassaa napparsimavaat, aamma najukkami innaallagialerisup innaallagissamut ikkussorfissat isumagisimallugit.  


Taamaammat suut tamarmik piareersimapput Krügerimit montøri suliassaminik aallartitsinissaanut Sisimiuni kiassaanermut aamma nunaqarfinnut immikkoortortaqarfimmi suleqataasoq Avatannguaq Dalager peqatigalugu suliaqarnissaminnut. Tassalu atortussap ikkussornissaanut aamma atorneqarnissaminut piareersarnissaanut.

Suliaq kusanartoq aamma piareersarluagaasoq, katillugu ukiup ataatsip missaanik suliarineqartoq. 

Ullumikkut imeqarfik najukkami nunaqarfimmi nakkutilliisumit taassumalu ikiortaanit nakkutigineqarpoq, taakku atortoq pillugu marluullutik montørimit ilitsersorneqareerlutik. Kisianni atortoq nutaaq imminit ingerlasarpoq, taamaallaallu misissorneqartassalluni arlaannik kukkunermik nalunaaraangat.

Tamanna qaqutigut pisarpoq, ikiortissamik atorfissaqartinneqaraangat nunaqarfimmi akisussaasuusoq taassumalu suleqatai ikiortaasarlutik. 


Paaviaaraq Enoksen 1998-imiilli Nukissiorfinni atorfeqarpoq. Ullumikkut Itillimi nunaqarfimmi nakkutilliisuuvoq: - Imeqarfittaarput nuannareqaarput, imerlu malunnartumik mammarnerulerpoq. Pissanganarsimavoq imeqarfiup napparneqarnerani peqataaneq.

Jokum Enoksen, Itillimi nunaqarfimmi ikiortaasoq:

- Innaallagissamik aamma imermik pilersuinissarput pisussaaffigaarput, tamannalu akisussaaffik annertuvoq. Taamaammat Itillimi imeqarfittaarput siuariarneruvoq.