Nukissiorfiit Maskinmesteritut ilinniartitaaneq nuannaarutigaat

Nukissiorfiit Sisimiuni Maskinmesteritut ilinniartitaanermut nutaamik ammaanermi peqataapput, tassani maskinmesteritut ilinniatut siulliit ilassineqarput maani nunatsinni aallartittussat

Ammaanersiorneq ataasinngornermi augustip ulluisa 15-ianni Teknikimik Ilinniarfimmi Sisimiuniittumi ingerlanneqarpoq tassanilu Nukissiorfiit peqataapput. Maskinmesteritut ilinniartunngortut 24-t ilassineqarpit taakkua atuarnissaat Sisimiuni aallaaveqassaaq – taamaattorli atuarnermi immikkoortoq ataaseq taamaallaat Danmarkimi ingerlanneqassalluni.
- Ulloq taanna assut qilanaarisimavarput, tamatumami kingunerisaanik maskinmesteritut ilinniarsimasut inuussutissarsiornermut ingerlaqqissapput, taakkua ilisimasanik, misilittakkanik aamma sulisussanik nutaanik pissarsiaqartissavaatigut, Ellen Kristensen Nukissiorfinni sulisoqarnermut pisortaq ammaanersiornermini oqalugiarami oqarpoq, nangillunilu: 
- Maskinmesterinik ilinniarnerminnut atatillugu praktikertoqartarneq annertuumik misilittagaqarfigaarput. Taakkua ilinniartoralugit aamma ajunngitsumik ingerlanissaannik pilersaarusiornermik, bachelorinngorniarnerminnut allaaserisaqarnissaannut. Ilissi tassunga killikkussi ilinniarnissi ingerlanerani taava assut qilanaarivara qinnuteqaateqarnissi takunissaat.

Qaaqqusaasunut ilaavoq aammattaaq Nukissiorfinni sulisoq Mathias Bust Skyttä, Nukissiorfinni maskinmesteritut atorfeqarpoq aamma Sisimiuni teamlederiulluni. Ilinniartunngortut oqaluttuuppai Nukissiorfinni atorfeqarnermi pissutsit qanoq ittuunerannik aamma tamaani unamminartut pissanganartorpassuit pillugit kiisalu periarfissarpassuit.

Ullumikkut Nukissiorfini maskinmesterit 35 missaanniittut atorfeqartut nuna tamakkerlugu siammarsimasut, kiisalu suli amerlanerpassuit atorfissaqartinneqarput. Taamaattumik Nukissiorfiit nuannaarutigaat inuusuttut maannakkut periarfissaqalermata ilinniarneq maani Nunatsinni ingerlassinnaalermassuk aamma periarfissat nutaat taamaaliornikkut ammaaneqarmata.

Nukissiorfiit pilersuinermik ingerlatsivittut innaallagissamik, imermik aamma kiassaanermik nioqqutissiornissamut akisussaasuuvoq Nunatsinni atuisartunut amerlanerpaanut. Taakkununnga ilaapput illoqarfiit 17-init aamma nunaqarfiit 53-it, taakkunannga 23-t kiassaateqarfeqarput, innaallagissiorfiit 91-it, imeqarfiit 69-it, taakkua saniatigut tallimanik imermit nukissiorfiuteqarpugut.