Qaanaami nutaamik ukiuunerani imermut tanki

Aasaru Qaanaami nutaamik ukiuunerani imermut tanki nutaaq atorneqalissaaq. Taanna ikkussorneqartoq piffissami qanittumi illoqarfiup pilersorneqarneranut pingaaruteqarluinnartussaavoq

Ukiuunerani imermut tanki nutaaq ikkussorneqartoq 5000 m3-imik imermik imaqarsinnaasoq illoqarfimmi taamaattut pingajussaraat, tamannalu siunissami taamaallaat Qaanaap illoqarfittaata kuummit imermit Nukissiorfinnit pilersorneqarsinnaalerneranik kinguneqassaaq.

Aammattaaq gummigedersuit atorlugit nilattartarunnaarnermik tamanna kinguneqassaaq, ukiuuneranilu nilammik aassigassamik ikuttaasoqarunnaavilluni.

Illoqarfimmi ukiuunerani imermut tankit pisoqqat marluk 2000 m3-imik imermik imaqarsinnaasut peqarpoq, taakku kuummit qanittumiittumit imermik immerneqartartut. Taakkulu pisoqaanerusut ilanngullugit illoqarfiup ukiuunerani imermik tamakkiisumik pisariaqartinneqartumik pilersorneqarsinnaaneranut naammassimanngillat, taamaattumillu Nukissiorfiit ukiut ingerlaneranni immami sikumit aallertariaqartarsimallutik.

Immikkulli ukiuunerani imermut tankeqalernermi imermut toqqorsiviit 9000 m3-mik imeqalissaaq, tamatumalu ukiuunerani illoqarfimmi imermik pilersorneqarnissamut pisariaqartinneqartoq tamakkersinnaalerlugu.  

Sivisuumik pilersaarutaasimasoq

Ukiuunerani imermut tanki nutaaq sivisuumik pilersaarutaasimavoq, nassuiaataasorlu ilaatigut tassaapput assartuinermut unamminartut. Soorlu assersuutigalugu sikusarnerata atortussat anginerit umiarsuarmit assartorneqarnissaat piffissami sivisuumi taamaatinneqartariaqarsimapput. Kisianni aammattaaq suliniummut tamakkiisumik aningaasaliisoqarnissaa, 32 millionit koruunit, pissarsiariuminaassimapput.

Taamaattorli maanna tanki ikkussorneqarpoq. Maannalu taamaallaat oqorsarneqarnissaa aamma tassunga atasumik teknikimut illuaqqap ikkussorneqarnissaa amigaataalerput ukiuunerani imermut tankip kiisami atorneqarsinnaalernissaanut. Kisianni tamatuma suliassap ukioq manna naammassineqarnissaa naatsorsuutigineqarpoq.
Ukiuunerani imermut tanki nutaaq atulerpat Qaanaaq illoqarfittaani ukiuunerani imermut tankit pingasut katillugit 9000 m3-imik imermik imaqartut atorneqalissapput.