Qeqertarsuatsiaani tatsip imeqarfiup imaqqortussusia paasineqarpoq

Tatsit imeqarfiit imaqqortussusiannik uuttortaanerit Sisimiuni pisussaagaluarpoq. Ajoraluartumilli akornutissarsisoqarpoq taarsiullugu Qeqertarsuatsiaani tatsip imeqarfiup imaqqortussusaanik uuttortaanermik kinguneqartumik.

Qeqertarsuatsiaat toqqarneqarnerat pissusissamisoortuuvoq, Nukissiorfiit apeqquteqarfigineqarmata nunaqarfimmi tassani immikkut aalisakkerivioreersup saniatigut allamik aalisakkeriviliornissamut imermik pilersuinissamut periarfissat paasiniarneqarmata.

Misissuilluni suliaq ullup suliffiusup ataatsip ingerlanerani naammassineqarpoq Nuummiit nunaqarfimmut angalatitsisoqarneratigut. Suliaqartut tassaapput suliniutinik aqutsisoq Martina Nauta aamma imermik pilersuinermi ingerlatsinermut siunnersorti Mads Albæk, Nuummiit nunaqarfimmut angalallutik apuukkamik tatsip imeqarfiup eqqaanut niuneqartut. 

Taamatut aallartippoq Nukissiorfiit siullerpaamik namminneq tatsip imeqarfiusup imaqqortussusianik uuttortaanerat, atortullu nutaaliaanerpaat atorlugit tamanna ingerlanneqarluni.

- Aamma imermi nipip ingerlanerata sukkassusia uuttortarparput immikkut illuinnartoq atortoq atorlugu. Suleqatigiit oqaluttuarput nipip sukkassusia tatsini tamani assigiippiarneq ajortoq.
Ulloq naanngitsoq suleqatigiit Nuummut uterput, tamaani kisitsisitigut paasisat tamarmik misissorneqarlutik. Tulliullugu tatsip naqqanik uuttortaanerit katillugit 1096-it uuttuiffiit GIS-specialistimut Sune Steenskjoldimut ingerlateqqinneqarput.

Uuttuiffinnit taakkunannga Sunep  Qeqertarsuatsiaani tatsip naqqa 3D-mik ilusia titartaganngortippaa (asseq takuuk). Naatsorsorpaa aammattaaq tatsip imaqqortussusia tatsillu imaqassusai pillugu titartagaliorluni takussutissiamik.
- Asiaq naatsorsuisipparput timaanit imeq qanoq annertutigisoq sialummit aamma apummit pisarnersoq. Kiisalu takusinnaalerparput imeq qanoq annertutigisoq pissarsiarineqarsinnaanersoq, aamma nunaqarfimmi immikkut aalisakkerivioreersup saniatigut allamik aalisakkeriviliornissamut naammassanersoq, Martina Nauta oqaluttuarpoq.

Misissuinerup inerneri tamakkiisut takutippaat ukiut tamaasa imeq tatsimut kuuttartoq nunaqarfimmi atorneqartartumit annertunerujussuusoq.

Misissuinerit aammattaaq takutippaat tatsimi erngup sisamararterutaannaa atorneqassasoq nutaamik aalisakkeriviliortoqarnerani.
- Pitsaanerpaarli tassaavoq uagut nammitsinnik tatsip imaqqortussusia uuttortarsinnaagatsigu, taamaalillugu Nukissiorfiit avataaneersunik inunnik suliaqartitsinermut aningaasartuutinik sipaaruteqartillugu. Tamanna pitsaalluinnarpoq, Martin naggasiivoq.