Nukissiorfiit suliassaasa pingaarnerpaat ilaat tassaavoq nunami tamarmi pilersuinermik aalaakkaasumik sunniuteqarluartumillu pilersuisuuneq. Taamaattumik pinngitsuugassaanngitsutut attaveqaasersuutitut pilersuinerup isumannaatsup iluaqutigisassaanik ingerlatsivitsinnik piffissaq tamaat aserfallatsaaliuillutalu pitsaanerpaanngorsaavugut.
2023-mi -86,2 mio. kr.-nut naleqqiullugu 2024-mi Nukissiorfiit naatsorsuutitigut ukiumi angusaq -60,2 mio. kr. tikippaa. Ukioq ataaseq affarlu akigititanik allannguisoqanngiffiup kingornatigut inernerisaq ilaatigut 1. juli 2024-mi 3,5 %-inik iluarsiivigineqartunit innaallagissamut imermullu akigititanit sunniuteqarfiuvoq. Akigititani allannguutit ukioq 2024-mi ilorraap tungaanut 30 mio. kr.-nik isertitatigut sunniuteqarput.
Taamaalillutik ukiup siulianut innaallagissamut, imermut kiassarnermullu tunisinermi assigiinngissutsit 7,8 mio. kr.-nik ilassutitut kaaviiaartitanik nassataqartitsisimapput, tamannalu ilaatigut Ilulissani mittarifliornermut sarfamik pilersuinermik pissuteqarpoq, aammalu 2024-mi Kangerlussuarmi uuttuutit amerlanerit Nukissiorfiit attavigilernerinik, kiisalu 2024-mi apriilimi uuliap akiata qaffannerata kingunerisaanik akit qaffannerinik pissuteqarluni.
2024-mi aalisakkanik suliffissuaqarfimmut tunisineq 18 %-ingajannik appariarpoq, ingammillu Ilulissani suliaqarnerup annikillinerata malitsigisaanik kaaviaartitat 15 %-ingajannik appariarput. Ilulissani aalisakkanik suliffigisami suliarisat tamatigoortumik annikilleriarsimapput, ilaatigut pisoqarnerup nalaatsortup nassatarisaanik, tamaani Polar Seafoodip umiarsuaataasa ilaat kivimmat. Tamanna imermik piumasaqarnermut sunniuteqartitsisimavoq, taamaalillunilu suliassaqarfimmi Nukissiorfiit sumiiffiusumi nioqquteqarneranut sunniuteqarluni. Ataatsimut isigalugu imermik tunisinermi 8 %-inik appariartoqarsimavoq, kaaviaartitani 2,6 %-inik, tamatumalu assigaa 2,4 mio. kr.
Atortussiassanut ikiuutinullu aningaasartuutit ukioq 2024-mi 17,0 mio. kr.-nik annertuseriarput, tamannalu ingammik 2024-mi upernaakkut uuliap akiata qaffanneri pingaarnertut pissutigalugit uuliamut atuinermut 16,4 mio. kr.-nik aningaasaartuutit amerlisimanerinik pissuteqarpoq.
2024-mi aningaasarsianut sulisunullu suliassaqarfimmut aningaasartuutit 31 mio. kr.-nik amerleriarput, taamaalillutik aningaasarsianut sulisunullu aningaasartuutit 15,7 %-inik qaffariarlutik. Tamanna ilaatigut AK-mut, Maskinmesterinut aamma Ilinniagartuunut isumaqatigiissutit 1. april 2023-mit utimut iluarsineqartuusunit iluarsiinernik tunngaveqarpoq, tamannalu aningaasartuutinik annertungaatsiartuusunik nassataqartitsisimavoq, kiisalu utaqqiisaagallartutut atorfiit arlallit Nukissiorfiit iluani inuttalerneqarsimanerinik tunngaveqarluni. Ilanngutissaaq ukioq 2024-mi sulisunut aningaasartuutini ilaasup 12,4 mio. kr.-nngorluni 1,3 mio. kr.-nik appariarnera. Pikkorissartitsinernut ataatsimiinnernullu 5,8 %-inik appariartoqarsimavoq.
Pilersuinerup isumannaatsuutinnissaanik anguniagaqartuarniarluni, ingammillu tunisassiorfittut siammarterisarfittullu ingerlatsiviit assut aningaasartuuteqarnartuunerini Nukissiorfiit iluani suli iluarsaassinissamut aserfallatsaaliuinissamullu suliassanik pilersaarusiornerit pingaarnersiuinerillu assut alaatsinaatarisaapput. Taamaattumik ukioq 2023-mi 104,9 mio. kr.-nit ukioq 2024-mi 110,5 mio. kr.-nut ingerlatsinermik suliniutini piginnaasatigut aningaasartuutinut ilaasut annertusisinneqarput. Ukioq 2024-mi ingerlatsinermi suliniutit naammassineqartut anginerit ilaatigut tassaasimapput: Ilulissani erngup nukinganik nukissiorfik 2,6 mio. kr.-lik, Aasianni aamma Uummannami pingaarnertut innaallagissiorfiit, 2 mio. kr.-lik, aamma 2,7 mio. kr.-lik, kiisalu Nuummi attaveqarfinnut stationi (netstationi) 1,7 mio. kr.-lik.
Periusissiaq ’Nukissiorfiit 2030-mi Patajaatsut’ aqqutigalugu Nukissiorfiit aningaasaqarnerani oqimaaqatigiissitsiffimmut inissinnissaa Nukissiorfiit suli assut alaatsinaataraa, tamaani siunertaq tassaalluni pilersuinerup sunniuteqarluartup isumannaarnissaa, taamaalisukkullu Nukissiorfiit isertitaasa aningaasartuutaasalu akornanni oqimaaqatigiissitsinerup pilersinnissaa.
