2024-mi upernaakkut Nukissiorfiit aamma Munck Gruppenip suleqatigiinnissaq atsiorsimavaat, tamatumalu ilaatigut Ilulissani CO2-mik aniatitsineq CO2-mik 2.502 tonsit missaannik annikillisaavigissavaa.
Munck Gruppenip asimi sulisunut tammaarsimaffianut, svejserinermut sannavianut, kiisalu asfaltiliorfianut, nunat tamalaanut attaviliisutut mittarfiup nutaap takkuttussap sanaartornera pissutigalugu suliaqarfiusunut minguitsumik nukissamik pilersuinerup qulaarnaarnissaanut piviusorpiani suleqatigiinnissaq tunngavoq.
Suleqatigiinneq pillugu nukissiornermut pisortaq, Cicilie Senderovitz oqarpoq:
”Ilulissani Munck Gruppenilu qanimut suleqatigiinnissamik atsiuinerup iluatsinnera Nukissiorfinniittugut assut nuannaarutigaarput. Ilulissani sinnilimmik nukissamik pigisaqarpugut, tamannalu Munck Gruppenip atuisartutut nutaatut maannakkut atulissavaa – silap pissusianut pitsaasoq, minnerunngitsumillu Ilulissanut pitsaasoq. Suleqatigiinneq iluatsippoq, aammalu attaveqaateqarfinnik pilersitsiniarneq anguniagaqarfigalugu illua’tungeriit tamarmik suleqatigiissimammata iluatsilluarluni, taamaalillunilu suliniut minguitsumut saanniarnikkut ingerlatassanut iluaqutaasumik iluatsissinnaavoq. Tassaavoq Nukissiorfinnut oqaluttuassaq iluatsittoq suli alla, aamma suleqatigisatut illua’tungerisatsinnut assut iluaqutaalersussaq”.
Suleqatigiinneq uuliamik 836.376 literit missaannik naatsorsuutigisatut sipaaruteqarnissamik nassataqassaaq, allanngortitatut naatsorsoraanni CO2-mut 2.502 tonsit missaannut annertussuseqartoq, tamatumalu assigaa Air Greenlandip timmisartuanik Tuukkamik Atlantiku qulaallugu timmisartornerit 27-t missaat.
Aamma Munck Gruppenimi suleqatigiinneq nuannaarutigineqarpoq. Munck Gruppenimi Senior Project Manager, Rasmus Schmidt-Petersen oqarpoq:
”Nukissiorfiit suleqatiginera assut iluarisimaarparput, aammalu Ilulissani asimi tammaarsimaffitta eqqaani sarfaliuutit dieselitortut qaminnissaasa maannakkut periarfissaqalernera iluarisimaarparput. Tamatuma nassataraa sulisutta nipiliornernik annikinnerusunik, aammalu silaannaap pitsaassusaanik pitsaanerusumik misigisaqarsinnaalernerat, aammalu Ilulissani suliniummut annertuupilussuarmik CO2-mik aniatitsinitsinnik annikillisaanerput. Taamaalilluni Munck Gruppenip pingaarnertut CO2-mik aniatitsinitsinnik annikillisaanissatsinnik, aammalu inuiaqatigiinnut, suleqatitsinnut aamma silap pissusianut piujuartitsisutut siunissamut ilalersuinissamut pingaarnertut sammisaqarneranut Nukissiorfinnik suleqateqarneq tulluartupilussuuvoq.”Ilulissani Munck Gruppenimik suleqateqarnerup atsiugaanera tassaavoq ukiuni makkunani Nukissiorfiit assupilussuaq suliaqarfigisaatut innaallagissamut aqqusersuinermik suliniutaani arlaliusuni suliniutini ataasertut ilaaginnartoq. Ilulissani nukissamik minguitsumik pilersuinissaq Nukissiorfiit sammisaraa, tamaani ullumikkut erngup nukinganik nukissiornermit sinnilimmik nukissaqartoqarluni, aammalu Nuummi, siunissami allisaqarnermi sinnilimmik nukissamik peqartoqalissalluni.
