Tamatumalu maajimi pinera qularutissaanngilaq, Nuummi Nukissiorfiit sulisui suli annermik suliaqarsimammata. Suliffeqarfiit allat amerlasuut peqatigalugit sapaatip akunnerani kingullermi Nukissiorfinni sulisut arpariarsinnaasut 20-t sinnerlugit ukiormanna Tusass-stafetimut katersuupput. Naak siallernera arpannissamut nakernaatsitsiniarpasikkaluartoq stafettimi piumassuseqarluarnermik qamisaanngilaq, tamaani ualeq tamaat isumagissaarnerit, arpaqatigiit imminnik tapersersoqatigiinneri, aamma high-fives’it nukissatsialammik tunisimmata.
”Ulluni suliffigisatsinni Nukissiorfiit iluanni suleqatigiiusugut nuannivissumik ataqatigiissuserput Tusass-stafettip uppernarsisimavaa. Aaqqissuussinerit taama ittut Nukissiorfiit suliffiginerani nuannaaruteqarnermik annertusaanissamut peqatigiilluta pikkoriffeqarnerput takutippaat, stafettip pinissarpiaa tikillugu immikkoortoqarfiit killeqarfii qaangerlugit ataatsimoorluta sapaatip akunnikkaartumik sungiusartarneq nuannisaarutigisarsimagatsigu. Tassalu stafetterneq sioqqullugu, ullormilu tassani misigisatsialannik amerlasuunik pilersitseqqissimavugut, peqqinnartutullu suliarisanut taama ittunut Nukissiorfiit suliffeqarfittut tapersersuisarnera assut pikkunarpoq,” HR-imi specialkonsulenti Lara Olsen oqarpoq, taannalu aamma ukiormanna Tusass-stafettimi Nukissiorfiit tungaannit peqataaqataavoq.
Maaji suliaqarfiusoq
Nukissiorfiit sulisuisa immikkut suliaqarfigisimasaanni Tusass-stafetti kisiartaanngilaq. Maaji tamaat Nuummi qullersaqarfimmi sulisut akornanni kina amerlanerpaanik pisunnermini alloriartarsimanersoq unammissutigineqarsimavoq. Tamanna peqqissutsimik aamma ataatsimoorfimmik sammisaliisumut Maaji Nuan’imut ilassutaavoq. Taamaalilluni maajimi qullersaqarfimmi suna tamaat tikillugu pisulluni alloriartoqarpoq, ullormi ataatsimi, aamma qaammammi tamarmiusumi amerlanerpaanik pisulluni alloriartarnerit unammissutaallutik.
Nukissiorfiit iluani sullivimmi avatanngiisitsialannut ilalersuisuisunik, aammalu ataatsimoorfimmik nukittorsaasunik – aamma suliffiup avataani – sulisutta tapersersuisarnerat nuannaarutigaavut.
