2023-mi Industrivejip kujataa’tungaa aqqusaarlugu Nuummi aamma Nuussuarmi ungasianit kiassaanermut aqqutit katersorneqarput. Tassunga atatillugu illoqarfiup ilaanik taakkuninnga marlunnik kattussisumik ungasianit kiassaanermut aqqut nutaaq sanaartorneqarpoq.
Pingaarnertut ungasianit kiassaanermut aqqut nutaaq namminersortutut inuussutissarsiortunut atuisartunut aqqutissanik pilersitsinissamut periarfissiivoq, taamaalillutillu kissarsuummi uuliatortumi uulia aqqutigalugu kiassaanermut taarsiullugu ungasianit kiassaanermik pissarsisinnaalerput. Tamannalu mingutsitsinngitsumut ikaarsaariartornermut pitsaasuuvoq.
Namminersortutut Inuussutissarsiortunit tapersersugaalluarneq
Namminersortutut Inuussutissarsiortunit Nuummi ungasianit kiassaanerup annertunerusup atulersinniarneranik suliniummut tapersersuisoqarluarsimavoq. Industrivejimi sanaartorfiusumi matumani ungasianit kiassaanermut aqqutit 13-it sanaartorneqassapput. Ungasianit kiassaanermut atuisartut nutaat ilagaat Ulo Rengøring, tassanilu pisortaanerup, Tom Andersenip ungasianit kiassaanermut attavilernissamut periarfissat assut nuannaarutigai:
”Ungasianit kiassaanermut attavilernikkut maannakkut ukiuunissaanut kiassarnermut minguinnerusumut atugaqalernissarput Ulo Rengøringimi nuannaarutigaarput. Aamma siunissamut tunngatillugu aalamik errorsisarfitsinni ungasianit kiassaanermik atugaqarsinnaanermut aningaasaliinissaq toqqarsimavarput, taamaalilluni aalaliarisatsinnik kiassaanermi ingerlataq siulleq ungasianit kiassaanermit pissammat, taamaalillunilu aamma errorsisarnermut saliisarnermullu ingerlattakagut aamma mingutsitsinnginnerulissapput.”
Namminersortutut Inuussutissarsiortunit tapersersorluarneqarneq aamma Nukissiorfiit iluanni nuannaarutigineqarpoq, tassanilu oqaaseqarpoq Filip Sivertsen:
”Industrivejimi ungasianit kiassaanermik suliniut mingutsitsinnginnermut ikaarsaariarnerup kisermaallugu pinnagu ataatsimoorulluguli ingerlatarineranut assersuutitsialaavoq. Taamaattumik Nuummi namminersortutut inuussutissarsiortunit/tassanngaannit atuisartunit Nukissiorfimmiit suleqateqarluarnerput, aammalu taakku suliaqarfigisaminnik piujuartitsinerusumik kiassaanermut ilalersuinerat assorsuaq nuannaarutigaakka.”
Ungasianit kiassaaneq suua?
Ungasianit kiassaaneq tassaavoq kiassaariaaseq, tassanilu assersuutigalugit kiassaatit, imaluunniit kiassaasarfiit natermiittut aamma imeq atorsimasaq aqqutigalugit inissianik kiassaanermut imeq kissartoq atorneqartarpoq. Ungasianit kiassaaneq pingaarnertut eqqakkanik ikuallaasarfimmit sinneruttutut kissarnermit, imaluunniit qitiusutut kiassaateqarfiit ilaannit erngup nukinganik nukissiorfimmit sarfamit tunisassiarineqartarpoq, pineqartumi kingullermi imeq kissartoq ungasianit kiassaanermut ruujorit aqqutigalugit illunut nassiussorneqartarluni, illunullu kiassaaneq pilersuutigineqareerpat kiassaateqarfimmut imeq taanna uterteqqinneqartarpoq.
Ungasianit kiassaanerup kissarsuutit uuliatortut arlallit taarserarpai, taamaalillunilu illunik kiassaanermit CO2-mik aniatitsineq annikillisarlugu.
Utoqqarmiut Kangerluarsunnguanni pilersaarutigisatut erngup nukinganik nukissiorfimmik allisaanissamut atatillugu sinneruttutut nukissamut takkuttussamut Nuummut annertunermik tunisaqarnissamik Nukissiorfiit iluani piareersaaneq sulissutigaarput. Tamatumunnga illoqarfimmut piareersaanitsinnut ungasianit kiassaanermik atugaqalerneq tassaavoq periutsit ilaat.
