Saamimmiit: Karoline Kleist AU-mi Nunat Tamalaat akornanni Niuerneq Pilerisaarinermilu juunimi allagartartaarpoq. Qiterlermiit tassaapput Camilla Telling aamma Naja Pjettursson, marluullutik AU-mi Aningaasaqarneq Isumalluutinillu aqutsinermi allagartartaartut.
Nukissiorfiit aammaarlutik tulluusimaarutigaat inuusuttut piginnaanillit arlallit praktikerfissaannik neqeroorfigisinnaagamikkit
Eqqorluartumik oqaatigalugu Nukissiorfinni inuusuttut arfineq-marluk allagartartaarput.
Inuusuttut taakku namminneq ilinniakkamik sammivissaat toqqarsimavaat, Nukissiorfiillu praktikerfissatut toqqaramikku tamanna eqqarsaatigilluarsimavaat.
- Nukissiorfiit toqqarpakka ingerlatsivimmi angisuumi sulineq misilikksukkakku. Toqqaaneralu pitsaasuuvoq, maannami uannut erseqqissilluinnarpoq suut uanga ilinniakkami piginnaasannut tulluartuunersut, qujamasuutigaaralu taamatut periarfissinneqarsimagama. Praktikerninnut siunertaasoq tamavimmi malinneqarpoq, Camilla Telling, qanittukkut AU-aningaasaqarnermut aamma sillimmatinik aqutsinermut allagartartaartoq, oqarpoq.
Camillap ilinniaqataata, Naja Pjetturssonip, aammattaaq Nukissiorfinni praktikernini nuannarisimavaa.
- Suliatigut aamma inuttut ineriartornermi pissanganarpoq aamma misigisimavunga assut tikilluaqqusaalluni maani Nuummi Qullersaqarfimmi suleqatit nuannersut aamma ikiuiumatuut. Kisissinnaanngilakka maani sorpassuit ilikkarsimasakka, Naja oquttuarpoq nangillunilu,
- Naak artornarsimagaluartoq praktikernermiit atualernermut, nalunngilara Nukissiorfinni praktikersimaninni ilikkakkakka siunissami ukiorpassuarni iluaqutigissagikka. Suliffeqarfik pissanganartuuvoq uagullu inuiaqatigiitsinnut pingaaruteqartuulluni. Taamaattumik Nukissiorfiit allanut praktikertussanut innersuussutigilluarsinnaavara, oqaluttuarpoq.
Aajuna allagartartaartut tamaasa allattorsimaffiat, taakku Nukissiorfinni tamarmik ilinniarnerminnik ingerlataqarnissartik toqqarsimavaat:
AU- Aningaasaqarneq Isumalluutinillu aqutsineq: Camilla Telling aamma Naja Pjettursson
AU- Nunat Tamalaat akornanni Niuerneq Pilerisaarinerli: Karoline Kleist
Skibsmontøritut: Kristian Olsen Petersen, Nuka-Leo Svendsen, Qillaq Davidsen Johansen aamma Kaaleeraq Motzfeldt
Issittumi Ingeniøritut praktikertoq: Tupaarnaq Olsen
Immikkut nukissiornermik teknologi suliniuteqartoq (Specialprojekt energiteknologi SDU): Anna Melchior Enggaard
Saffiorfimmi praktikertoq: Jakob Kjeldgaard
Nukissiorfiit allagartartaartut pilluaqquaat siunissamilu unamminartorpassuarnik suliaqarlutik siunissaqarnissaannik kissaallugit, minnerunngitsumillu praktikernermik nalaanni suliaqarsimanerannut qujallutik.Nuannersimavoq uagutsinni praktikertorisimanersi.
