Nukissiorfiit 2022-mut ukiumoortumik nalunaarusiaq saqqummiuppaat.
Tassani atuarneqarsinnaasoq Nukissiorfiit aammattaaq pilersuisut allat assigalugit Covid-19-ip kingunerisaanik killersuinerit qaangiuttut malugisimagaat aamma piffissami matumani Europami sorsuttoqarnera. Piviusumik akigitinneqartunik qaffaanissap ilimasaarutigineqarnerata aamma pisisarfitsinnit kinguaattoornerit, aamma tamakkua soorunami Nukissiorfiit teknikimi attaveqaasersuutaasa ineriartortinneqarnerat kinguartippaat, soorlu generatorit, transformatorit aamma ledningit aqqutaat.
Nukissiorfiit 2022-mi pilersuinermi aalaakaanerup pitsanngorsarnissaa, pilersuinermik qulakkeerinninnerup aamma digitalimik atuinermi isumannaallisaaneq qitiutippaat. Nukissiorfiit ingammik aningaasaqarneq qitiutissimavaat aamma minnerunngitsumik qulakkeerniarlugu Nukissiorfinnut aamma kalaallinut inuiaqatigiinnut suut iluaqutaanersut.
Tamakkiisumik ingerlatsinermi pitsanngorsaanermut aammattaaq ilaapput nuna tamakkerlugu erngup pitsaassusianik pitsanngorsaaneq. Pisimavoq aamma suli ingerlanneqarpoq imermik imerneqartussap isumannaatsuuneranit (DDS) siunissaq eqqarsaatigalugu suliaqarneq.
Nukissiorfiit 2022-mi sullittakkanut internet aqqutigalugu iserfissaq nutaaq saqqummiuppaat ilaatigut digitaliseriineq tapersersorniarlugu – kisianni aammattaaq sullitat ajunngitsumik misigisaqarnissaat siuarsarniarlugu aamma utaqqisarnerit sivikilliniarlugit.
Aalajangiinerit nutaat
Politikikkut arlalinnik 2022-mi arlalinnik aalajangiisoqarpoq tamakkua Nukissiorfinnut annertuumik sunniuteqarput. Tamakkua ilaatigut tassaapput Nukissiorfiit siunissami Kangerlussuarmi, Narsarsuarmi aamma Qaarsuni nukissiamik aamma imermit pilersuinermut akisussaasunngorpoq. Aammattaaq 2022-mi ukiakkut politikikkut aalajangerneqarpoq Nukissiorfinni siulersuisussat pilersinneqarnissaat.
Naalakkersuisut ukiup matuma aallartinnerani aalajangersaapput Aasiaat/Qasigiannguit eqqaanni nutaamik imermit nukissiorfiliortoqarnissaa pillugu aammattaaq Nuup eqqaani nukissiorfiup allineqarnissaa NunaGreen A/S-mit ingerlanneqassasut. Tamatumunnga ilutigitillugu Utoqqarmiut Kangerluarsunnguanni imermit nukissiorfik NunaGreen A/S-mut nuunneqassasoq. Suleqatigiinnermut tassunga killiussat 2023-p ingerlanerani inissinneqarnissaat naatsorsuutigineqarpoq. Siunissami Nukissiorfiit aalajangiusimavaat Utoqqarmiut Kangerluarsunnguanni imermit nukissiorfiup ingerlanneqarnera suli akisussaaffigissallugu kiisalu aammattaaq imermit nukissiorfiit nutaat Aasiaat/Qasigiannguit eqqaanniittunik ingerlatsineq suliarissallugu.
Suliassat tamakku tamaasa Nukissiorfiit aqutsisuisa suliffeqarfimmi sulisut pikkorissut aamma aallussilluartut peqatigalugit kivitseqatigiinnissaq qilanaaralugu.
Ukioq nutaaq
Nukissiorfiit 2023-mi innaallagissamik aamma ataavartumik nukissiamik atuinermik suliaqarnertik ingerlateqqissavaat, taamaaliornitsigut inuiaqatigiinni aningaasaqarneq aamma avatangiisinik mianerinninneq siuarsassavarput, Nukissiorfiit uuliamik pinngitsuuisinnaaneq annikillisarniarpaat kiisalu taamaaliornikkut CO2-mik aniatitsineq killilerlugu. Nukissiorfinnit pineqarpoq Kalaallit Nunaata siunissaa pillugu Nukissiorfiit avatangiisit, pilersuinerup, suliffeqarfimmi kulturip aamma aningaasaqarnerup oqimaaqatigiilernissaat pilersinniarpaat.
