Nuummi Nukissiorfiit qullersaqarfiani aaqqissuussiffimmi Pisiortornermut akiligassaqarfimmullu immikkoortoqarfiani inuttaasut tassaapput Aviaaja Heilmann, Ulla Kleist, Karoline Kleist, Linda Schmidt aamma Malia Kuitse. Arnat taakku tallimat ulluni suliffinni pilersaarusiugarisarpaat atortussanik pisiortornissat, pilersuisartunik nassaarniarnerit, assartukkat tikinnissaat pillugit apeqqutilliissutinik akissuteqarnerit, akiligassat takkunnerinik nalunaarsuinerit, kontomi allassimasunik naleqqussaasarnerit, akiligassanik akiliisarnerit allarpassuillu.
Immikkoortoqarfik ammasoq
Amerlasuut aqutassaapput, immikkoortoqarfimmili imminnut suliassat qanoq agguataarnissaat pillugit paaseqatigiilluartarput, taamaalillutik saaffiginnissutit tamarmik malittariffiusarneri isumannaartarlugit: ”Immikkoortoqarfimmi akunnitsinni pitsaalluinnartumik attaveqaqatigiittarpugut, tamaanilu akunnitsinni oqaloqatigiinnitsinni ammasuulluinnarluta. Aamma suleqatinut allanut taamaappugut, immikkoortoqarfinnillu allanik ikiuerusuttuuvugut”, Aviaaja, Pisiortornermut akiligassaqarfimmullu immikkoortoqarfimmi pisortaq oqarpoq.
Nukissiorfiit iluani suleqataasut ikiuiumatussuseq aamma malugisarpaat, immikkoortoqarfiummi sineriammi suleqatit nioqqutinik pilersitsillunilu inniminniisarnernik ilaatigut ikiortarpai. Tamannalu piaartumik pisarpoq, akuttunngitsukkummi immikkoortoqarfik nalunaaquttap akunnerata affaata iluani akissuteqartarpoq.
Assigiinngissutsinut inissaqartitsineq
Pisiortornermut akiligassaqarfimmullu immikkoortoqarfimmi piffissamik killilikkanik malittarisassaqarfimmi, amerlasuunik isumagisassaqarfimmi, aamma kisitsisinik marloriarluni misissortarialinni sullivimmi avatangiisutsialaat piginissaat pingaartuupput, tamaanilu arnat taakku tallimat imminnut siunnersiorsinnaasassapput: ”Akunnitsinni toqqissisimavugut, suleqatigiilluarpugullu. Ilaatigut nukittoqqutitta atornissaat pikkoriffigigatsigu taama ippoq”, Ulla oqaluttuarpoq.
Ilaannikkooriarluni immikkut ulapaartoqarsinnaavoq, taamaattumillu sullivimmi avatangiisut najornissaasa iluarisimaarnarnerat pitsaasuuvoq, tassungalu Karoline ilanngussaqarpoq: ”Nukissiorfiit iluani tamatigoortumik sullivinni avatangiisit pitsaasuupput, tamaani sulisunik isumassuineq pitsaasuummat. Inunnut, inuillu qanoq issusiinut assigiinngitsunut ataqqinnittoqarpoq.”
Kikkut tamaasa arnat ullorissaarnissaannik kissaappagut!
