Nuummi innuttaasut sarfaqannginnermik misigisaqarfiannut piffissamut sivisunerusumut patsisaasoq tassaavoq Utoqqarmiut Kangerluarsunnguani erngup nukinganik nukissiorfimmit sarfap aqqutaani ingerlatsissutip nakkarsimanera.
Ingerlatsissutip amigaataasup illoqarfik sarfap sakkortussusianik equngasutut ittumik pissarsiaqartippaa, tamannalu siullertut pisoqarfiusumi arlallit sarfamik pilersorneqartut allat pilersugaajunnaarput. Taamatut equngasutut ittumik sarfap sakkortussuseqarnera kukkussutaasup nassaariniarneranik ajornakusoortitsivoq, Nukissiorfiillu sarfamut aqqusaarussummik amigaateqartoqarnera inerniliissutigimmagu Nuummi ajornartoorfimmi innaallagissiorfik aallaqqaataaniit aallartinneqartariaqartussanngortippaa, taamaattumillu taassuma pilersuinermik ingerlatsilersinnaalernissaanut, aammalu illoqarfimmut sarfap sakkortussusianik pissusissamisoortumik pilersuilersinnaalernissaanut Nuummi innaallagissamik atuisartunut tamanut qamitsitsisoqartariaqarsimavoq. Sarfap equngasutut ittup nassatarai pumpit, serverit, aammalu innaallagissamik atuisutut atortut allat ingerlasinnaajunnaarneri, taamaalillunilu suliffippassuarnik, aammalu inunnik innaallagissamik atuisartunik akornusersuivoq.
Tassunga aamma ilaapput pumpit, ileqqorisaattut ajornartoorfimmi innaallagissiorfimmi motoorinik kissassimaartitsisut, taamaammallu taakku unimmata motoorit nillortissimapput. Motoorit ilaasa aallartinnissaannut kissassuseq aalajangersimasoq pisariaqarmat aallartitsiniarneq sivisunerusimavoq.
Ingammik innuttaasut innaallagissamik kiassagaasut piffissaq sivisunerusoq kiassarneqarfiunngitsoq misigaat, taakku attavilernissaannut nalinginnaasumut naleqqiullugu tamanna sarfamik annertunerusumik pisariaqartitsimmat. Taamaalilluni innuttaasut ikittukkuutaartillugit Nukissiorfiit attavileqattaartariaqarpai, tamatumani suli qamittooqqinnermik pinngortitsisumik annertunerusumik artukkiinissaq pinaveersinniarlugu.
Taamatut ittumik qamittoornerup ilusaanik Nukissiorfiit iluani aatsaat misigisaqarpugut, tassalu erngup nukinganik innaallagissiorfimmit sarfap aqqutaanik ingerlatsissummik annaasaqarfigisatsinnik, taamaakkaluartorlu Nuummi atuisartut tamarmik ataatsikkut qanittoortoorfiginngisaannik. Uagut sarfanik equngasutut ittunik ilungersortinneqarpugut.
Inuttaasut paasinninnerannut qutsavigeqqippagut, suliarpullu nangillugu ingerlateqqipparput.
