Arfininngorneq ulloq 24. januaarimi nal. 22:35 Nuuk tamarmi innaallagiaaruppoq. Tamatumunnga patsisaavoq ulloq taanna Utoqqarmiut Kangerluarsunnguanni assut sakkortuumik assarnaarnaamik anorersuarnerata kingunerisaanik sarfamik ingerlatitsissutit marluk ima imminnut qanitsigilersimapattut allaat attuttoorlutik qamittoortitsillutik.
Innaallagiaaruttoqaraangat Nukissiorfiit qanoq sulisarnerat pillugu oqaluttuukkusuppatsigit, taamaattumik maskiinaqarfimmut iseqatigitigut.
Sarfaaruppoq – Nukissiorfimmit qanoq iliortoqarpa?
- Innaallagissap aqqutaani nunamiittumi kukkussuteqarneq pillugu pigaartutut suleqaterput kalerrinneqarpoq, sillimmatitullu innaallagissiorfimmukarnerani illoqarfik tamakkerluni nal. 22:35 innaallagiaaruppoq.
- Erngup nukinganik nukissiorfimmi, ulloq unnuarlu inuttaligaasumi suleqatigut attavigaagut. Sooq innaallagiaaruttoqarnera peqatigiillutik paasiniarsaraat.
- Sillimmatitut innaallagissiorfimmi sulisut attuumassutillit tamarmik takkussuupput. Sulisut 20-t tungaannut takkupput – arlallit nammineq piumassutsiminnik.
- Qullersaqarfimmi IT-lerisugut takkupput, tassani suliffiup iluani attaveqarfinnik pilersitseqqinnermut ikiuiartorlutik.
- Arlaleriarluta erngup nukinganik nukissiorfik aqqutigalugu pilersuineq aallarteqqinniarsaraarput, Utoqqarmiulli Kangerluarsunnguanni assarnaarnera pissutigalugu iluatsinngilaq.
- Taamaalisukkut elværkimi innaallagissiorfimmi dieselgeneratorit (sarfaliuutit solaaritortut) piareersarlugit sulisut allat ulappupput, erngup nukinganik nukissiorfimmit pilersuinissaq iluatsissanngippat taanna pilersuinermik ingerlataqalertussaammat.
- Unnuap qeqqata missaani innaallagissiorfimmit tamakkiisumik pilersuinerup ingerlannissaa aalajangiupparput.
- Nal. 04:30 Nuuk tamarmi innaallagiaqaqqilerluni sarfaneqqippoq.
- Sapaammi nal. 13:57 Nuuk erngup nukinganik nukissiorfimmit tamakkiisumik pilersorneqaqqilerpoq.
Sooruna sillimmatitut innaallagissiorfimmit pilersuinerup aallarteqqinniarnera taama piffissamik atuinartigisartoq?
Sillimmatitut innaallagissiorfipput tuugassaq tuuinnarlugu aallartiinnarissatut ingerlatsiviunngilaq, tassalu illlit inigisanni pærit ikillugillu kissalaalersitsilluni. Sillimmatitut innaallagissiorfimmiipput motoorit dieselitortut pingasut pingaarnerit, assigiinngitsunik innallagiamik nukittussutsimik tunisisut, illoqarfimmullu sarfamik pilersuinertik aallartissinnaassagunikku tamarmik ataasiakkaarlugit ikittariaqarput.
Motoorit aallartikkaangata illoqarfik tamarmi ataatsimoortumik sarfamik pisinnaaneq ajorpoq. Taamaaliortoqassappat artukkiineq sakkortuallaalissaaq, motoorillu qameqqissapput – tassalu sarfaarunneq pinngoqqissaaq. Taamaattumik annikitsukkuutaamik illoqarfik attaviligaallunilu pilersorneqarnera annikitsukkuutaatut pisarpoq: illoqarfiup ilaanit allamut, sumiiffimmit sumiiffimmut allamut. Tamannalu piffissaamik atuinartarpoq.
Sarfaqaleqqilluni innaallagiaqaqqilernissaanut piffissamik atuinartoq patsisaasoq alla tassaavoq sarfaarunnerup kingornatigut Nuummi netstationit amerlasuut orniguffigalugit attavilertariaqartarnerat. Illoqarfimmi netstationit katillugit 129-upput. Inoqutigiinnut sarfamik ingerlatitseqqiffittut agguataarisarfittut pingaarutilittut atuuffeqarput.
Annertunerusumik sarfaaruttoqaraangat stationini taakkunani arlallit nakkutilliisarfitsinnit ikeqqinneqaannarsinnaanngillat. Taamaattumik ingerlatsiffimmi sulisugut illoqarfimmut orniguttaqattaassapput, netstationillu 30-35-t attavilissavaat atuisunut sarfamik pilersueqqittoqalersillugu. Tamanna pilersuinerup aallarteqqinnerani aamma kinguarsaataasarpoq, uagutsinnilli periarfissaqarfiginiakkatut suliaq sapinngisamik piaarnerpaamik isumagineqartarpoq.
Nuup tamarmiusup sarfaneqqinnissaanut ull. 25. januaarip unnuunerani sillimmatitut innaallagissiorfiup aallartinnerata kingornatigut nal. akunnerinik sisamat missaannik sivisussuseqarpoq.
Aqaguani Utoqqarmiut Kangerluarsunnguani anoraarulluni qatsoqqissimavoq, pilersuinerlu erngup nukinganik nukissiorfiup isumageqqissinnaalerpaa. Sapaammi nal. 13:57-mi Nuuk erngup nukinganik nukissiorfimmit tamakkiisumik pilersorneqaqqilerpoq.
Qujanaq!
Innaallagiamik pilersuinerup qamittoornerani akisussaaffimmik periataarsinnaassutsimillu takutitsisunut sulisutsinnut angisuumik ilumoorussamillu qujassuteqartoqassaaq. Arlallit unnuaq tamaat pigaartuupput, aatsaallu sarfamik pilersuineq nalinginnaq tamakkiisumik aallarteqqinneqalersimalermat angerlarlutik. Nukissiorfiit pisortaqarfiata tungaanit iliuuserisaannut assorsuaq qutsaviginnittoqarpoq.
Nalunngilagut innaallagiaarulluni sarfaarunnerit pakatsinartartut, taakkulu toqqissisimannginnermik pilersitsisartut. Tamatigulli sapinngisamik sukkanerpaamik pilersuinerup aallarteqqinniarnera tamatigut sulissutigisaripput neriorsuutigaarput.
Innaallagiamik pilersuinermi qamittoornikkut sarfaaruttoornerit tamatigut misilittakkanik pingaarutilinnik tunisisarput, taakkulu kingornatigut nalilersuisarnitsinni ilaasarput, siunissamullu tunngatillugu upalungaarsimanitsinnik nukittorsaanermut iluaqutaassapput.
Atuisartut innaallagissamit qaminneqarsinnaasutut kiassarneqartut (Innaallagissamik kiassaaneq - Nukissiorfiit) akuttoqatigiissaartumik tunuliaqutitut pilersuutigisatik misilerarlugillu isumannaarnerisigut Nukissiorfiit ikiorsinnaavaat, soorlu kissarsuutip uuliatortup eqqortumik atuunneranik misissuinertigut. Taamaalilluta sarfaaruttoornermi artukkiineq annikillisissinnaavarput, sukkanerusumillu pilersuineq aallarteqqitsillugu.
Innaallagiaamik pilersuinerup qamittoorneratigut sarfaarunnerup nalaani innuttaasut nikallujuinnerannut, aammalu qamittoornerup nalaani innersuutitsinnik malittarisaqarnerannut qutsavigerusuppagut.
Ajornartoortoqarnissaanut piareersimagit
Naalakkersuisut nittartagaanni ajornartoornernut piareersimanerit pillugit ilisimatitsissutinik peqarnera eqqaamajuk, taakkumi ilaatigut innaallagiamik qamittoortoqarnerani sarfaarunnernut piareersarnertut ittunik siunnersuutitsialannik imalimmik nittartagaliorsimapput.
Quppersagaq ugguuna takuuk: Naalakkersuisut angerlarsimaffiit ajornartoornermi piareersarnissaannut siunnersuutinik nassiussipput.
