Nukissiorfiit 2025-mut ukiumut inernerisai -32,7 mio. kr.-upput.
Tassaavoq 2024-mi inernerusumut -60,2 mio. kr.-usumut naleqqiullugu malunnartumik pitsanngoriaat. Peqatigitillugu pingaarnertut kaaviiaartitat, ukiup siuliani kaaviaartitanut 796,5 mio. kr.-usunut naleqqiullutik 824,9 mio. kr.-nut qaffariarput.
Nukissiorfiit 2025-mi siusinnerusumut naleqqiullugu nalikillisaatinik ikinnerusunik suliaqarsimaneranik inernerisat ilaatigut takutitsipput. Nalikillisaataasut sumiiffinni maannakkut akigititanik taakkuninnga peqarnikkut ingerlatsiviit sanaartugaasut akilersinnaanngiffiini suliarineqartarput. 2025-mi 2024-mut naleqqiullugu 21 mio. kr.-nik ikinnerusunik nalikillisaasoqarpoq.
Ukiumit ukiumut nalikillisaataasut allanngorarsinnaapput, apeqqutaalluni Nukissiorfiit nunami sumerpiaq ingerlatsivinnik sanaartukkanillu aningaasaliisimanera.
Ulloq 1. januaari 2025-mi akini iluarsiissut 3,5% Naalakkersuisut akuersissutigaat. Tamatuma saniatigut kiassarnermut akigititaq ulloq 1. juuli 2025-mi iluarsineqarpoq, tamatumunnga orsussap/uuliap akiisa qaffakkiartornerat peqqutaavoq.
Innaallagissamut aki aatsaat 2026mi januaarimi iluarsineqarpoq, tamatumalu nassataraa Nukissiorfiit 2025- mi illoqarfiit erngup nukinganik nukissiorfeqanngitsut innaallagissiornermut uuliamut 19 mio. kr.-t pallillugit annertunerusunik aningaasartuuteqarnerat.
Nukissiorfiit tungaanut aningaasaqarnermi tunngavigisamik pitsaanerullunilu siulittuutigiuminarnerusumik pilersitsiniarluni sooq akinik iluarsiinerit pisariaqartuunerinik tamanna erseqqissaavoq – taamaalilluta – piffissamut qanittumut, aammali siunissamut – pilersuinermik ataavarlunilu isumannaatsumik qularnaarisinnaassagatta.
Ukiumi inernerisaq pillugu nukissiuuteqarnermut pisortaq Johan Danielsen ima oqaaseqarpoq:
”Ingerlavimmi eqqortumiippugut, sulili angusassarput tikinngilarput. Attaveqaasersuutitta ilarujuissui pisoqalipput, nutarterinissamik aningaasaleeqqinnissamillu pisariaqartitsineq annertuvoq. Piffissaangallartillugu aningaasaliinngikkutta qamittoornerit amerlanerusut annertunerusumillu aningaasartuuteqarnissaq aarleqqutigisinnaavarput.
Aningaasaleeqqinnerit ataavartumik pilersuinermut akisussaassuseqartumillu aningaasaqarnermut tunngavilisuupput. Taamaattumik aningaasaqarnermi oqimaaqatigiissitsinermik pilersitsinissamik anguniagaqarluta sulivugut, peqatigitillugulu Kalaallit Nunaat tamakkerlugu ingerlatsinermik ataavartumik qularnaariniarluta.”
Nukissiorfiit aningaasaqarnermi nukittorsaaviginissaa suli ukkataraa, aammalu nuna tamakkerlugu nukissamik pilersuinermik ataavartumik, isumannaatsumik, siunissarlu ungasinnerusoq eqqarsaatigalugu qulakkeeriniarpoq.
Nukissiorfiit ukiumut nalunaarutaa tamaat uani atuaruk.
