Marlunngorneq 5. marsi 2024 tassaavoq ulloq Nuummi Hotel SØMA-mi elektrokedelip (avataanit kiassarneqartumit imermik kissarsuutip) iverteqqammersup tamakkiisumik ingerlatarilerfia.
2023-mi ukiakkut Nuummi elektrokedelimik ivertitsinissamut tunngatillugu Nukissiorfiit Hotel SØMA-lu suleqateqalerpoq, siunertaq tassaalluni minguitsumik nukissamik kiassarnermik akunnittarfimmut pilersuinissaq. Taamaattumik tamaaneereersutut kissarsuut uuliatortoq taamaallaat sillimmatitut atuutiinnassaaq. Ivertitsinerup nutaap ukiumoortumik CO2-mik 142 tonsit missaannik sipaaruteqarnermik nassataqassasoq Nukissiorfiit missiliuutigaa.
Nuummi nunap immikkoortuani pisortaq Filip Sivertsen peqatigalugu suliniutinik ataqatigiissaarisartoq Max Nøraa Nielsen elektrokedeli ullormi unnuamilu ataatsimi siullermi ingerlatarinera malinnaaffigiartorpaat. Nuannaarutigalugu elektrokedelip 2550 KWh-inik kiassarnermik minguitsumik pilersuisimanera nalunaarutigisinnaavaat.
Nukissiorfiup pisortaa Cicilie Senderovitz oqarpoq:
”Suleqatigiinnerit nutaat ingerlatarileraangatsigit tassaasarpoq ulloq pitsaalluinnartoq, peqatigiillutami annertunerujussuarnik ingerlatsisinnaavugut. Tamanna aaqqissuussiffimmi nukissamik pitsaalluinnartumik tunisisarpoq, taamatullu ingerlatsinermik suleqatitsinnit pikkorissunit suliniutip naammassineqarnera, suullu tamarmik naatsorsuutigisatut ingerlanerat pillugit nalunaarfigineqaraangama uannut Nukissiorfiup pisortaatut nukitsialammik pissarsisarpunga.”
Nukissiorfiit tamatuma ingerlannerata saniatigut nalunaaruteqartarnermut sakkussamik ivertitsinissamik suliaqarpoq, taamaalilluni suliniutinik tamakkuninnga Nukissiorfiit siunissamut tunngatillugu sukumiinerusumik malinnaaffigisinnaassammat, taamatuttaarlu suliniutinik nalilersuiuarsinnaassalluni.
