Anorersuaqqileqaaq

Anorersuaqqileqaaq

 

Piffissami kingullermi timmisartornerit, nalunaarasuartaateqarnermi attaviit, imaani angalanerit kiisalu innaallagissamik, imermik kiassanermillu Nuummi pilersuineq silap sunneqqavai. 

Nukissiorfiit ippassaq nalunaarutigaat, Utoqqarmiut Kangerluarsunnguata Nuullu akornanni erngup nukinga atorlugu innaallagissiorfimmit innaallagissamik pilersuineq utaqqiisaagallartumik iluarsineqarsimasoq aammalu nalunaarutigalugu innaallagiaq errorsinernut, kissarsuutip uutsiviatigut siatsinernut juullillu ulloriaasa ikumatinnerannut atorneqarsinnaanngortoq.

Kisianni – matuma allannerata nalaani Kujataaniit illoqarfiit pingaarnersaannut ingerlavoq anorersuaq aamma alla, sinerissamullu kujasinnerusumut anngutereerpoq.

Nukissiorfiit taamaattumik illoqarfimmi erngup nukinga atorlugu innaallagissiorfimmut kabelimi ajoqutaasup, sapaatillu akunnerani kingullerpaami innaallagiaarutitsisaqattaartup suunerata paasinera nuannaarutigaat. Nuup Utoqqarmiut Kangerluarsunnguannit erngup nukinga atorlugu innaallagissiorfimmit pilersorneqaqqilissutigisaanik tallimanngormat utaqqiisaasumik iluarsiisoqarpoq.

Utaqqiisaasumik iluarsiisoqarneranik oqartoqarnera isumaqarpoq, kabeli sermimit qallerneqaruni anoraasuarfigineqarunilu ajutooqqinnissamut suli annerusumik ulorianartorsiortinneqartoq. Taamaattumik naak Nuuk maanna nalinginnaasumik innaallagialersorneqaleraluartoq, Nukissiorfiit suli annertuumik upalungaarsimavoq naatsorsuutiginngisamik anorersuaq kabelit attuuttoortillugit innaallagiaarutsitseqqissagaluarpat piareersimasunik.

”Maannakkut pisumi utaqqiisaasumik iluarsiineq periarfissat pitsaanersarigallarpaat, ataqatigiissakkamillu naammassineqarsinnaasimanera assut nuannaarutigaarput. Naluneqanngitsutulli nunatsinni sila naalagaraarput aammalu issittumi silap pissusaa ilaanneeriarluni peqqarniissinnaasartoq isumaqarpoq qallikkut pisut ajornartorsiortitsilersinnaanerannut piareersimajuartariaqartugut,” taama oqarpoq nukissiornermut pisortaq Kaspar Mondrup.

Sapaatip akunnerani kingullerpaami pisut unamminartullu ersarissisilluarpaat, pisuni ilungersunartuni aalajangiisussat allat suleqatigilluarnissaasa attaveqaqatigilluarnissaasalu qanoq pisariaqartiginera aammalu Nukissiorfiit allatut ajornartumik allatut eqqarsartariaqalersoq. Tamanna ilusiliinernik ajunngilluinnartunik arlalinnik kinguneqarpoq, ilaatigut inuiaqatigiinni suliaqarfiit pinngitsoorneqarsinnaanngitsut ilungersunartorsiorfinni pissamaatitut innaallagissiorfimmut attavilerneqarsinnaanerannik aammalu imermik dieselimillu ataqatigiissitsilluni nukissiornermik ingerlatsinernik pitsanngorsaasoqarmat. Tamakku tamarmik kinguneraat upalungaarsimanerup tamarmi aammalu Nukissiorfiit siunissami ajornartoortoqartillugu ilungersunartorsiortoqartillugulu ilisimanninnerullutik pilertornerullutillu suliarinnissinnaanngornissaat.