Anorip nukinga siunissami

Nukissiorfiit siunissami takorloorpaat anorisaatit nunami maani pilersuinermik pingaaruteqartutut atuuffeqalernissaannik.

Anorimit nukissiaq pilersuinermut ataavartumik nukissiutinut suussutsinut allanut ilanngullugu allatut periarfissaavoq pitsaasoq, aamma illoqarfinni nunaqarfinnilu dieseli atorlugu nukissiuutinik pioreersunik  nioqqutissiornermut tapertaalluarsinnaavoq. Tassami anorimik nukissiorneq periarfissaalluarpoq ataavartumik tunngaveqartumik nukissiornissamut sumiiffinni soorlu assersuutigalugu imermit nukissiorneq periarfissaanani. 

Taamaattumik Nukissiorfiit 2018-imili anorisaatit atorneqarsinnaanerisa ilimanaateqarnerat misissorpaa. Siullermik qitiutinneqarpoq Sisimiut eqqaanni anorisaatinik misileraaffimmik pilersitsinissaq. Tamaani 2018-imi ukiakkut anorisaatit marluk napparneqarput. Anorisaatit nioqqutissiortunit marlunnit assigiinngitsuneersuupput taaneqartartut illut eqqaanni anorisaatissaqqittutut 25 meterinik portussuseqarlutik. Anorisaatinik sanasuupput Solid Wind aamma Viking Wind. Anorisaatit marluullutik tamarmik immikkut annerpaamik 25 KW nioqqutissiarisinnaavaat.
Anorisaatit marluk annerpaamik nioqqutissiorsinnaanertik 25 KW anorlernerani 9-10 m/s-mik sakkortussuseqartumi angusarpaat. 

Nukissiorfiit piffissami misileraaffiusumi ajunngitsumik ilisimasaqalerpoq aamma ingerlatsineq pillugu misilittagaqalerluni anorisaatillu taakkua marluk atorsinnaassusiaannut. Taamaattorli taakkua pilersuinermut ilanngutsissallugit suli piariivinngillat.

Nukissiorfiit piffissaq misileraaffiusoq anorisaatinik naleqqussaanermut aamma ajoqutaanik anorisaatinik sanasut peqatigalugit iluarsaassisarnernut atorpaat. Suliaq tamanna suli ingerlanneqarpoq.

Ajoqutit aamma pitsanngorsaanerit
Anorisaatip Solid piffissap misileraaffiusup ingerlanerani suluusai marloriarlutik ajutoorput, kingullermik januaari 2020-mi. Suluusat ajutoornerat pivoq issinnerani aamma sakkortuumik anorlernerani. Suluusai issinnerani qerattarpallaartarput aamma pissutsit taamaannerani ingerlatsillutik sajuppilunnerit akiorsinnaasarnagit.
Oktobarimi 2020-mi suluusat nutaat ikkussuunneqarput uuttortaanermut atortulersorlugit sajuppilunnerit qanoq pilersarnersut paaserusunneqarmat. Suli misileraaneq ingerlanneqarpoq ajornartorsiutip soorpiarnera paasiniarlugu.  

Anorisaat Viking aallaqqaataaniillu aqutsissutaani ajortoqarpoq. Aqutsinermut sikaaviani isugutalersarpoq qerisarlunilu aamma anorisaatip geariani ajornartorsiuteqarpoq. Ajornartorsiutit taakkua maannakkut iluarsineqareerput kiisalu Nukissiorfiit maannakkut misissorpaat anorisaat taanna Sisimiut nunaqarfiisa arlaannik pilersuinermut ilanngunneqarsinnaanersoq.

Taamaattumik siunertaasoq tassaavoq anorisaatit taamatut ittut siunissami Nukissiorfiit nunaqarfinnik pilersuinerani ilanngunneqarnissaat, taamaaliornikkullu nunaqarfinni ikummatissanik nunap iluaneersunik atuineq annikillisinneqassammat.

Anorisaatit ataavartumik tunngaveqartumik nukissiamik Kalaallit Nunaanni illoqarfinnik aamma nunaqarfinnik pilersuinermut alloriarneruvoq pingaaruteqartoq, piffissaq ungasinnerusoq eqqarsaatigalugu nukissamik pisariaqartitsinerup ilaanik malunnaateqarluartumik matussusiisinnaallutik, ingammik nunaqarfinni.

Illoqarfiit aamma nunaqarfiit sorliit siunissami anorimit nukissiamit pilersorneqarsinnaanersut paasiniarlugit Nukissiorfiit atortunik anorimik uuttortaassutinik ikkussuipput, ilaatigut Aasianni, Qasigiannguani, Uummannami aamma nunaqarfinni arlalinni.