Batteriit taarsernissaannut piffissanngorpoq

Nuummi, Nuussuarmi Qinngutsinnilu atuisunut imermut kiassarnermullu uuttuutilinnut nalunaarut

Nukissiorfiit aalajangersimasumik sullissinerannut atatillugu, atuisutta imermut kiassarnermullu uuttuutaanni batteriinik taarsiinissamut piffissanngorpoq.

Suliassaq taanna piffissartornarlunilu annertuvoq, tassanilu atuisutsinnik suleqateqarneq suliassami ingerlatassatsinni pingaaruteqarluinnartuuvoq.
Taarsersuineq pingasunngornermi ulloq 13/1 aallartinneqassaaq, Nuummilu Innannguaniit aallartissaagut.

Batteriinik taarsersuineq ulluinnarni piffissami ualikkut tallimanit unnukkut arfineq pingasut (17:00 – 20:00) tungaanut pissaaq. Imaluunniit arfininngornerni sapaatinilu piffissap ullaakkut qulit ualikkullu pingasut (10:00 – 15:00) akornanni pisassaq.

Teknikeritta pisariitsumik sukkasuumillu batteriinik misissuillutillu taarsiinissaat pingaaruteqarpoq, suliassarlu tamanna sivisunerpaamik minutsinik qulinik sivisussuseqassaaq, taamaattumillu atuisutta akornutitaqanngitsumik uuttuuteqarfinnut isersinnaanissaq isumagissagaat Nukissiorfiit kaammattuutigiumavaat.

Nukissiorfiit Facebookikkut quppernerani Nuummi, Nuussuarmi Qinngutsinnilu illoqarfimmi sumi kiisalu piffissami illoqarfiillu immikkoortuani sorlermi kasuttornissarput pillugu atuisuvut ingerlaavartumik paasissutissinneqassapput.

Suleqatigiilluarnissaq neriuutigaarput, imermullu kiassarnermullu uuttuutit batteriivisa tamarmik nutaanik taarsernissaat qilanaaraarput. Batteriit tamarmik 2021-p aasaanera tikitsinnagu taarserneqareersimanissaat Nukissiorfiit neriuutigaat.