Imermik nukissiorfiliorneq aalajangiineruvoq eqqornerusinnaanngitsoq

Qasigiannguit Aasiaallu eqqaanni nutaamik imermik nukissiorfiliornissaq aammalu Utoqqarmiut Kangerluarsunnguanni imermik nukissiorfioreersumik allilerinissamik aalajangiineq silap pissusia inuiaqatigiillu ineriartornissaat eqqarsaatigalugit nutaarsiassaavoq avaqqutassaanngitsoq.

Nukissiorfinnut 1993-imili imermik nukissiorfiliortoqaqqaarmalli atasinnaasumik allanngortitsinermik sulissutigininnikuusumit aalajangiineq nuannaarnermik annertuumik isumalluarnermillu pilersitsivoq, nukissiorfiit pisortaaneq Kaspar Mondrup oqaluttuarpoq.

- Aalangiineruvoq eqqornerusinnaanngitsoq, uagullu tulluusimaarlutalu nuannaarpugut inuiaqatigiinnut atasinnaasumik tunngaveqarlutik piorsaasunut, uagut nammineq nukissiornitsinnik tunngavilinnut, ingerlatsisuulluta akuusinnaagatta, Kaspar Mondrup taamak oqarpoq. 

Piviusoq eqqarsaatigalugu imermik nukissiorfiit annertusarneqarnissaannik aalajangerneq isumaqarpoq, nunarput siunissami ikummatissanik atuiffiunngitsumut pingaaruteqarluinnartumik alloriartoq. Imermik nukissiorfiit nutaat atulerpata pisortat ataavartumik nukissiornerat ullumikkut 70 procentiusumiit 90 procentinut qaffassasoq.

Imermik nukissiuuteqarnerup annertusarnissaanut siunnersuut, pingajussaaneerneqaqqammersup Inatsisartunillu akuersissutigineqaqqammersoq, Nukissiorfiit immikkoortumut pilersaarummi anguniagaasut piviusunngortinniarnerinut aalajangiisuulluinnarpoq, ilaatigut imarimmagu sumiluunniit, periarfissaqarfiusumi, nukissamik ataavartumik 2030-mi atuisoqalissasoq.

Atasinnaasoq – aamma allatut

Imermik nukissiorfiliornermut aningaasaliinerup aammattaaq erseqqissarpaa, siunissaq uuliamiinngitsoq akerlianilli ataavartumik nukissiamiittoq. Uuliamut sanilliullugu erngup nukinga qinigassaavoq pitsaanerusoq silap pissusia aammalu aningaasaqarneq eqqarsaatigalugit. Imermik nukissiorfittaassat biilit innaallagiatortut amerlanerulernissaannik aammalu kiassaatinik uuliatortuniit innaallagissamik kiassaatinut nuuttoqarnissaanik periarfissiipput.

Naalakkersuisut imermik nukissiorfiliornermut aningaasaliisoqarnissaanik aalajangernerat alloriarneruvoq pingaaruteqarluinnartoq inuiaqatigiinnut pitsaanerusunut, pisuunerusunut piujuaannartitsisinnaanerusunullu, nammineq nukissiatsinnik ingerlasunut, Nukissiorfiit taamak isumaqarput.

- Nunarput piujuaannartumik nukissiorfittut siuttunngortissinnaavarput, aammalu imermik nukissiorfiliornermut aningaasaliinerit nutaat maannamut annertunerusumik takutissavaat, imermik nukissiorfinnik ingerlatsinermut qanoq piginnaaneqartiginerput issittumi pissutsit immikkuullarilluinnartut atugarigaluarlutigit. Tamatuma nunarsuarmioqatitsinnik suleqatigiinnissamik isumaqatigiissutit pitsaasut nassatarisinnaavai aammalu aningaasaleerusuttoqalersillugu, taamak oqarpoq Kaspar Mondrup.

Inuutissarsiutinik periarfissat siunitsinniipput

Piujuaannartitsineq aallaavigalugu nukissiorneq, pingaartumik imermik nukiliorfeqarnermi, nunatta siuttunngorsinnaanerata silap pissusianut ajunngequtaasunik kinguneqaannarani aamma aningaasarsiornikkut periarfissarpassuarnik malitseqassaaq.

Erngup nukinganik nukissiorneq ikummatissanik nukissiornermiit akikinneruvoq. Amerlanerusunik imermik nukissiorfiliornerup aammattaaq suliffiit inuutissarsiorfiusinnaasullu allat piujuaannartitsinerup iluani teknologiimik atuiffiusut ineriartorfiullutillu aningaasaliiffigineqartut pilersissavai.

- Imermik nukissiorfiliaasinnaasut sermersuarmi ”toqqortaasullusooq” nunarsuarmi batteriit annersaattut isigineqarsinnaapput, taakku nukimmik pilersitsisinnaasuupput ima appasitsigisumik akilimmik 70 kr./MWh, Kaspar Mondrup oqaluttuarpoq.

Suliniutit taamaattut aningaasaliiffigineri tassaapput, taassuma oqarnera malillugu, tupinnaannartumik niuerluarnertut isigineqarsinnaasut – silap pissusaa eqqarsaatigalugu aammalu aningaasarsiorneq – tassami imermik nukissiornerujussuit tupinnaannartumik annertussusillit suliffissuarnik aammalu aningaasaleerusuttunik kajungilersitsisussaapput nunatta aningaasaqarneranut inuiaqatigiillu ineriartornerannut iluaqutaasumik.

- Assersuutigalugu suliffissuit nukimmik atuisorujussuit nukimmik piujuaannartitsineq aallaavigalugu pilersitamik pilersorneqarsinnaapput imaluunniit nukik pilersitaq e-fuels-inik (Power to X)-nik taaneqartartunik tunisassiornermut atorneqarsinnaavoq, siunissami innaallagissiorfinni dieselitorfiusuni, umiarsuarni, timmisartuni atorneqarsinnaasunik aammalu nunanut allanut tuniniarneqarsinnaasunik. Periarfissat amerlaqaat, imermillu nukissiorfiliornissamik aalangiinerup siunissaq piujuaannartumik aallaaveqarnerujussuaq pilersissavaa, Kaspar Mondrup naggasiivoq.