Inuusuttuuneq, qiimasuuneq alapernaatsuunerlu

Inuusuttuuneq, qiimasuuneq alapernaatsuunerlu

Taakku inuusuttut arfineq pingasut sapaatip akunnerisa 12-anni Nukissiorfiit Nuummi Utoqqarmiut Kangerluarsunnguanni erngup nukinganik innaallagissiorfimmut pulaartut tamavimmik ilisarnaatigaat

Nukappiaqqat pulaartut alutorsaqisut apeqqutissaqaqisullu ”Timi Asimimeersut” 14-nit 17-nut ukioqarput. Nukappiaqqat assigiinngitsorujussuarnik tunuliaqutaqarput, tamarmilli erngup nukinganik innaallagissiorfiup qanoq isikkoqarnera qanorlu ingerlasarnera takorusuppaat.

Nukappiaqqat ataasinngornermi ullaap tungaani aqqarnup missaani Utoqqarmiut Kangerluarsunnguannut tikipput, tassanilu Nukissiorfiit sulisuisa tikilluaqquvaat, maskinaqarfimmukannginnermilu innaallagissiorfik ilisaritippaat. Nukappiaqqat inuusuttut soqutiginnittorujussuupput, amerlasuunillu assigiinngitsunik apeqquteqarlutik. Sulisut ulluinnarni sulerisarnerat, pingaartuusarnerat piffimmilu taamaattumi sulinissamut suut pisariaqarnersut aamma tusarusuppaat.

Apeqqarissaarnerup kingorna qaarusukkut 600 meterinik takitigisukkut maskiinaqarfimmut pisupput, tassanilu nukappiaqqat alutorsaatigeqisaminnik takupput.

- Arlaannaataluunniit sanaartukkap qanoq angitiginera takorloorsimanngilaa. Maskiinaqarfiup taama appasitsigisumiillunilu qaqqap iluani ungasissumiinnera assut pikkugaat, Kim Godtfredsen, Nuummi ”Timi Asimi” pisortaa oqaluttuarpoq.

Nukissiorfiit ”Timi Asimi”-mik pulaartoqarusunnerat nuannaarutigaa.

- Tamatta pulaarnerput nuannaarutigeqaarput, nukappiaqqallu pikkugeqigaat malugisinnaavara, taanna oqarpoq.

Taamattaaq Jens Bjerge, Utoqqarmiut Kangerluarsunnguanni ingerlatsinermi aqutisoq, piffimmillu takuniaatitsisoq inuusuttuaqqat pulaarnerat nuannaarutigaa.

- Nukappiaqqat pulaartoralugit assut nuannerpoq, apeqquterpassuarnillu saqqummiussuinerat nuanneqaaq. Inuusuttut innaallagissiorfimmik soqutiginnillutillu pikkuginnittut assut malunnarpoq, taanna oqarpoq.

Angalaqatigiit Nuummut utinnginnerminni nukiappiaqqat Nukissiorfiit pulaartunut allattaaviannut allapput, tamannalu Kim Godtfredsenimut eqqaamasanik qaffakaatitsivoq.

- ”Timi Asimi” 2014-mi novembarimi Utoqqarmiut Kangerluarsunnguannut pulaarnikuusoq nukappiaqqanut takutippara. Taamanikkut aamma inuulluaqqussummik allappugut, peqataasut allaaginnarlutik.

- Nukissiorfinnut qujanarujussuaq pulaarsinnaagatta. Tamanna nukappiaqqanut assut pingaaruteqarpoq, Kim Godtfredsen oqarpoq.

Inuusuttunik immaqa siunissami suleqatissanik pulaartoqarneq Nukissiorfinnut aamma taamak pingaaruteqartigaaq. Taamatut pulaartoqartarnitsinni suliffitsinnik pissanganartumik nittarsaassivigisarpavut, neriuppugullu inuusuttut ilinniakkamik pissanganartumik Nukissiorfiit peqataaffigerusutaannik ilinniagaqarusulersinnaanerannik tamanna kinguneqassasoq neriunarpoq.