Kujataa solarimik akisuumik pilersorneqarpoq

Qorlortorsuup Taartullu akornanni innaallagissap aqqutaata kipisoornerata Nukissiorfiit Narsami Qaqortumilu solaarimik akisuumik atuisariaqalersipaa. Periuseq taanna isumannaatsuuvoq, akisullunili.

Qaqortoq Narsarlu Qorlortorsuarmi erngup nukinganik innaallagissiorfimmit nukissiamik nungutsuitsumik nalinginnaasumik pilersorneqartarpoq. Nunatsinni erngup nukinganik innaallagissiorfiit allat sisamat assigalugit innaallagissiorneq taamaattoq nunatta isumalluutaanik akikitsumik atuinerullunilu innuttaasunut namminersorlutillu suliffeqarfiutilinnut nukissiamik qulakkeerisuusarpoq. Ajoraluartumilli anorersuup Qorlortorsuup tungaanut innaallagissap aqqutaanik aseruivoq.

Nukissiorfinni atuisut pilersorneqarnerat tamatigut pingaarnersaatinneqarpoq, qamittoornermillu nalaanneqaraangatta pilersuineq aallarteqqinniarlugu ulapputtarpugut, tamannalu aamma matumani sukkasuumik iluatsipparput. Taamaammallu kipisoorneq Qaqortumi Narsamilu pilersuinermut sunniuteqanngilaq. Tamanna Nukissiorfiit ajutoornermi silimmatiminik solaarimik ingerlatilinnik sukkasuumik pilersueqqilerneranik patsiseqarpoq.

Erngullu nukianik innaallagissiorneq assiginagu, solaarimik pilersuineq akisoorujussuuvoq. Maanna Nukissiorfiit Qaqortumi Narsamilu pilersuinermini ullormut solaarimik atuinerunera 13.000 liiterit missaanniippoq, tamannalu ulloq unnuarlu 70.000 kr-nik aningaasartuuteqarnerunermik naleqarpoq.

- Nukissiamik nungutsuitsumik, nunatta uuliamik pisiortornerani milliuunilippassuarnik sipaartitsisartumik, annertuumik pilersuinerput tulluusimaarutigaarput. Kipisoorneq misigeqqammigarput qanoq erngup nukinganik innaallagissiorfiit aningaasaqarnermut uuliamillu atuinermut sunniuteqartarnerannik eqqaasitsivoq, Nukissiuuteqarnermut pisortaq Kaspar Mondrup oqarpoq.

Nukissiorfiit sapaatit akunnerisa aqqarnata naanerani nukissiamik minguitsumik pilersueqqilerluni ajoqusernerup aaqqinnissaa naatsorsuutigaa, tamatumanilu sila apeqqutaassaaq.

Paasisaqarnerujumallutit uunga attaveqarit: nukissiorfiit@nukissiorfiit.gl