Marluussisarneq immikkuullarissoq ukiuni qulini

Innaallagisserisunngorniat suliffeqarfiit marluk akornanni sulisorineqartarnerat Aasianni ukiut qulit matuma siornagut aallartippoq.
Aaqqissuussaq Nukissiorfiit innaallagissamik aqqusersuisut namminersortut akornanni innaallagisserisunngorniat ilinniarneranni marluussisarnerannik imaqarpoq.

Tamanna isumassarsinermik aallaaveqarpoq tassaallunilu Nukissiorfiup innaasserisutut ilinniartussanik amerlanernik pisariaqartitsineranik. Nukissiorfinni ingerlatsinermik akisussaasut pisortaata Ovenguaq Lyberthip aaqqiissutissarsiorneranik aallartippoq – piareersaasioreerlunilu sumiiffinni arlalinni innaallagissamik aqqusersuisutut namminersortut, soorlu Elektrikerit ApS aamma Aasiaat VVS ApS Aasianniittut, isumaqatigiissuisorfiginerput.
- Ilinniartuunermi suut tamaasa nalinginnaasumik ilinniarusunneqarajuttarput. Nukissiorfinni iserfigineqarsinnaasut tassaapput innaallagissiorneq tamakkiinerusoq namminersortunilu illuni innaallagissamik aqqusersuineq nalinginnaasumik ilinniarneqartarluni. Taamaattumik ilinniartut marluunneqarsinnaaneranik isumaqatigiissusiorsinnaalerpugut. Suleqatigiinneq nuannaarutigisimaqaarput – sulilu nuannareqalugu, Ovenguaq Lyberth oqaluttuarpoq.

Inuiaqatigiinnut akisussaaffeqarpugut
Ovenguaq Lyberthip suna oqaluuserinerlugu ilisimavaa. Innaallagialerisutut 1989-imi ilinniarnini naammassivaa aamma tamatuma kingornatigut ungasianit ilinniartitaaneq aqqutigalugu, el-installatøritut ilinniarnini 2007-imi naammassillugu. Ilinniaqqinneq suleqatini arlallit peqatigalugit Nukissiorfimmi sulinermik saniatigut naammassivaat.

- Nukissiorfinni ukiut 30-t sinnerlugit sulereerpunga, sulisutullu taamatut ilinniaqqissinnaaneq assorluaq pissarsinarpoq. Uagutsinnut sulisuusunut, kisianni aamma suliffeqarfimmi ingerlatsinermut, piginnaasanik ineriartortitsineq eqqarsaatigalugu. Nukissiorfinni ilinniartussatsinnut ilinniakkamik qaavatigut suliffeqarfimmiiginnarlutik naammassereerlutik qaffassarsinnaanerat taamaattumik iluaqutissatut oqaluttuarisinnaasarparput, oqarpoq imalu itisiliilluni:
- Nukissiorfiit inuusuttunut ilinniagalerusuttut eqqarsaatigalugit inuiaqatigiinni akisussaaffeqarpoq. Innaallagisserisutut ilinniartut suliffeqarfiit arlariilluta ilinniartitarisinnaanerisigut akisussaaffitsinnik kivitseqatigiissinnaalertarpugut.

Nukissiorfiit ukiuni qulini innaallagisserisoq ataaseq ilinniakkaminik naammassitippaat. Kisianni naatsorsueqqissaarnermi sorsuakkiarinngilarput, Ovennguaq Lyberth oqarpoq.
- Suliffeqarfiit arlariilluta ilinniartoqarneq ilinniarnissamik kajuminnarnerulersitsivoq, ilinniarnermi innaallagissereriaatsit arlariit ilinniarneqartarmata. Pingaarnerpaavorli ilinniartut sarfamik sakkortuumik ingerlatsinerup suuneranik ilikkagaqartissinnaasaratssigit aammalu inuusuttut suliaminnut pikkorissut  naammassitissinnaaleratsigit. Siunissaq ungasinnerusoq eqqarsaatigalugu suliaavoq imminut akilersinnaalluartoq, oqarpoq.

Nukissiorfiit sulisoqarnermut HR-afdeling-iata innaallagisserisunngorniartut suliffeqarfinnik allanik suleqateqarluni ilinniartuutigineqarsinnaanerat sinerissami sumiiffinni allani tamani periarfissanngortinniarlugu suliaq aallartereerpaat (ilaatigut Arssarnerit aamma Royal Greenland oqaloqatigalugit).

).