Nukissiorfiit annertuumik amigartooruteqarpoq

Nukissiorfiit ukiumoortumik naatsorsuutitik saqqummiuppaat. Taakku takutippaat Nukissiorfiit 2020-mi oqaluttuarisaanermi aatsaat taamak amerlatigisunik amigartooruteqartut 153 mio. koruuninik.

Taamaattoqarpoq naak Nukissiorfiit 2020-p ingerlanerani niuernini pitsanngorsarsimagaluaraa aamma pilertornarisumillu ingerlallugu. Nukissiorfiit akigititaasa aaqqissuussaanerat pissutaalluni immikkut ittumik nalikilliliinerit pisariaqarsimapput, taamaattumillu amigartooruteqarneq aaqqissuussaanikkut amigartoorutaavoq.

Assigiimmik akeqartitsinerup 2018-imi atuutilersinneqarnerata kingornatigut, tamanna Nukissiorfiit aningaasaqarnerannut unamminartoqarsimavoq. Nukissiorfiit 2020-mi innaallagissamik nioqquteqarnermini illoqarfinni nunaqarfinnilu 68-iusuni 63-ini amigartooruteqarpoq, imermullu tunngatillugu illoqarfinni nunaqarfinnilu 66-iusuni 63-ini amigartooruteqarpoq.

Nukissiorfiit aningaasartuutai suliffeqarfiup isertitaanit amerlanerupput aamma aningaasat naammanngillat atortunik naammaginartumik aserfallatsaaliuinissamut, tamatumalu kingunerisaanik maannakkut annertuumik kinguaattoorneq aallartikkiartorluni. Aningaasaqarniarneq ataqatigiissinniarlugu Nukissiorfiit ukiut tamaasa Nunatta Karsianit aningaasanik taarsigassarsisarpoq; taamaattorli taarsigassarsiat taakkununnga akilersukkanit amerlanerupput. Nukissiorfiit akiitsui amerliartuinnarput akerlianik sanaartukkanik aserfallatsaaliuineq naammaginartumik ingerlanneqarnani. Tamanna naggataatigut pilersuinissamut qulakkeerinninnermut navianartorsiortitsisinnaavoq.

Nukissiorfiit pisortaanerat oqaaseqarpoq:

- Nukissiorfiit nalorninartorsiorluni inissisimavoq tamatumani pisariaqarluinnarpoq piaarnerpaamik aningaasaqarniarnerup iluarsineqarnissaa. Taamatut ingerlaannassagutta akiligassat amerliartuinnassapput aamma pilersuinissamut qulakkeerinnissinnaaneq appariartulissaaq. Tamanna uagut akuerissanngilarput. Qujanartumilli piginnittuvut, Namminersorlutik Oqartussat, ajornartorsiutip annertussusia pillugu oqaloqatigilluartarpavut. Tamatta isumaqatigiippugut ajornartorsiut iluarsineqartariaqarnera pillugu.

Nukissiorfiit innersuussutigaat februaarimi 2021-mi Naalakkersuisut akuersissuteqarnerat, Nukissiorfiit aningaasaqarniarnerat kukkunersiuisunit avataaneersunit misissorneqarnissaa pillugu. Naatsorsuutigineqarpoq misissuineq 2021-imi aasap ingerlanerani naammassineqarnissaa

Ukiumoortumik naatsorsuutit 2020