Nukissiorfiit innaallagissamik pilersuineq naleqqussarpaat imermit aamma dieselimit nukissiorneq ataatsimoortillugit

Arlalippassuit annertuumik sulinerisa ullut unnuallu marluk ingerlanerini, maannakkut illoqarfiup 99 procentia innaallagissamik pilersorneqalerpoq. Tamatumunnga ilutigitillugu illoqarfimmi imeqarfiit tamarmik aamma ingerlaqqilerput.

Qularnaatsumik pilersuinissaq pilersinniarlugu Nukissiorfinnit innaallagissamik pilersuineq allanngortinneqarpoq, taamaaliornikkut imermit nukissiorfimmit aamma dieseli atorlugu imminnut ataqatigiissumik ingerlatsisoqalerpoq. Kingulleq taaneqartoq Sarfaannguani innaallagissiorfimmit sillimmataasumit ingerlanneqarpoq.

- Soorunalimi pisoq taamaattoq assut ilungersunartutut isigivarput. Teknikimut tunngasunik sulisutta pisinnaasatik suut tamaasa atorlugit aaqqiiniarlutik sulipput, taakkua atorlugit pilersuinerup aallarteqqinnissaanut aamma qulakkeerneqarnissaanut pilertortumik iliuuseqarniarlutik, ingammik iniaqatigiinni aarleqqutigineqarsinnaasunik atuisartut eqqarsaatigalugit. Nukissiorfinni pisortaaneq Kaspar Mondrup oqarpoq.

Innaallagissamik aamma imermit nukissiorfimmit ataatsimut katillugit ingerlatsinerup kingunerissavaa illoqarfiup tamakkerluni pilertornerusumik innaallagissamik pilersoqqinneqalersinnaanera, tassa imermit nukissiorfimmit qamittoortoqaqqissinnaanera eqqarsaatigalugu.

Tamatuma saniatigut nukissiorfiit illoqarfimmi pilersuinermi aqqutit allanngortippat imatut, sullittakkat aarlerinarsinnaasumik eqqorneqarsinnaasut soorlu, Ulluinnarni atorneqartussanik nioqqutillit, Tusass, Upalungaarsimaneq, Peqqinnissaqarfik il.il. innaallagissiorfimmit sillimmataasumit pilersorneqartussanngorlugit, kiisalu tamatumuunakkut imermit nukissiorfimmit attaveeruttoqassappat eqqorneqarnissaat annikinnerulertussanngorlugu.

- Ilimagaarput imermit nukissiorfimmit attaveerunnernut amerlasuunut innaallagissap illoqarfiup tungaanut aqqutaani ledningit ajoquteqalersimanissaat, naatsorsuutigaarpullu taakkua helikopteri atorlugu misissorneqarnissaat tamanna silap ajornartikkunnaariarpagu.

- Nukissiorfinni nalunngilarput ullut kingulliit artornarlutillu aamma qanoq pisoqarnissaanik takorlooruminaatsitsisimasut, taamaattumik sullittakkavut qutsaviginiarpavut assut naammagittarnerannut aamma uagutsinnut tapersersuinerannik misigisatsinnut. Ajoraluartumilli aammattaaq tamatumunnga atatillugu erseqqissaatigisariaqarparput, kingusinnerusukkut sarfaaruttoornissaq pisinnaammat taamaattorli ilimagineqarsinnaasumit annikinnerusumik, tamatumunnga pissutaavoq imermit nukissiorfiup aamma dieselimik nukissiornerup imminnut ataqatigiittumik ingerlanneqalernera,” Kaspar Mondrup naggasiivoq.