Nunatsinni maskinmesterinngorniarluni atuarsinnaalerneq Nukissiorfiit nuannaarutigaat

Nunatsinni teknikikkut suliffeqarfiit annersaasa ilaattut, Nukissiorfinni KTI Sisimiut maanna pingaarutilimmik teknikikkut ilinniartitaanermik suli allamik neqerooruteqalernera nuannaarutigaarput.

Nukissiorfinni inuit pikkorissut atorfissaqartittuaannarpavut. Sulisut nunatta nukissiaanik atuilluarnerusinnaanitsinnik uatsinnut ikiuussinnaasut pisariaqartippavut. Isumagisassatsinnik suliassarpassuaqarpugut, sulisullu piginnaanillit ilinniarluarsimasullu taakkunannga suliarinninnissaat pisariaqartipparput. Taamaammat ukiup nikinneranit KTI-p maskinmesterinngorniarnermik ilinniartitaanermik, teknikikkut suliffeqarfimmi uatsitut ittumi qaffakkiartornissamut patajaatsumik toqqammavissiisumik, neqerooruteqartalernissaa nuannaarutigaarput.

Nukissiorfiit nunatta inuusuttortaasa pitsaasumik ilinniagaqarnissaannik isumannaarinissamut akisussaaffimmik annertuumik tigusinissatsinnut piareersimavugut, sulisuttalu 10 procentiisa ilinniakkamik ingerlatsinissaat anguniagaraarput. Sisimiuni maskinmesterinngorniartut nutaat praktikerfinnik pisariaqartitsilerpata, Nukissiorfinni akisussaaffimmik kivitsinissatsinnut, nunattalu immikkoortuini tamani assigiinngitsorpassuarnilu amerlasuuni unammilligassanik neqeroornissamut piareersimavugut.

KTI oqaloqatigilluarsimavarput, taakkulu teknikimik ilinniagalinnik pisariaqartitsinerput paasilluarpaat. Suleqatigiinnerup tamatuma maanna Sisimiuni maskinmesterinngorniarsinnaalernerup pisinnaalerneranik inerneqarnera annertuumik nuannaarutigaarput. Nunatsinni ilinniarnissamik periarfissanik ineriartortitseqataanerput nuannaarutigalugulu tulluusimaarutigaarput, Nukissiorfinni HR-mi pisortaq Bebiane Boye Hansen oqarpoq.

Siusinnerusukkut Danmarkimut aallarluni maskinmesterinngorniartoqartarpoq. Sisimiuni ilinniarsinnaalernikkut ilinniarneq tamakkingajallugu nunatsinni pisinnaalerpoq, tamannalu annertuumik iluaqutsiissasoq Bebiane Boye Hansen oqarpoq, imalu nangippoq:

Maani ilaqutaqarlunilu ikinnguteqaraanni Danmarkimi arlaleriarluni sivisuumik ilinniartarniaqarneq soorunami unammillernarsinnaasarpoq. Maanna nunatsinni ilinniartoqarsinnaalerpoq, illoqarfigisamilu nunaqarfigisamiluunniit praktikertoqarsinnaalerpoq, taamaalillunilu attaveqarfigisat attatiinnarnissaat ajornannginnerujussuanngorpoq.

Nukissiuuteqarnermut pisortap Kaspar Mondrupip maanna piffimmi pingaarutilimmik teknikimik ilinniagaqartoqarsinnaalernera aamma nuannaarutigaa.

Nukissiorfinni nunatta nukissiamik imminut pilersulernissaanik sulissuteqarnerput qularutigineqassanngilaq, taamaalillutami uuliasisarnitsigut aningaasat nunatsinnit annissornerat pinngitsoortissavarput. Sulisussanilli, ’ piginnaasalinnik, ilisimasanik ilinniartitaanernillu imminut pilersorsinnaanerulernerput taamatulli aamma pingaaruteqartigaaq. Sisimiuni maskinmesterinngorniarnermik ilinniartitaanermik pilersitsineq alloriarneruvoq pingaarutilik, Nukissiorfinnilu ilinniartunngorumaartussat suleqatiginissaat KTI-llu suleqatiginerata nanginnissaa qilanaaraarput.

Nukissiorfinni praktikkerusukkuit uani erseqqinnerusumik paasisaqarsinnaavutit https://nukissiorfiit.gl/kl/Nukissiorfiit-pillugu/Atorfiit-inuttassarsiuussat imaluunniit hr@nukissiorfiit.gl attaveqarlutit.