Parisimi isumaqatigiissut alloriarneq tulliuvoq pissusissamisoortoq

Nukissiorfiit piujuartitsinermut allanngortitsiartuaarneq 1993-imili sulissutigalugu aallartippaat, taamani maani nunami imermit nukissiorfik siulleq pilersinneqarmalli. Taamaattumik Nukissiorfinnit isumaqarpugut piujuartitsinermik tunngaveqarluni siunissamut alloriarneq pissusissamisoortoq Naalakkersuisut Siulittaasuata Múte B. Egedep nalunaarutigimmagu Naalakkersuisunit kissaatigineqartoq Parisimi isumaqatigiissummut 2015-imeersumut ilanngunnissaq.

Taamatut nalunaaruteqarneq silaannaap allanngoriartornera pillugu ataatsimiinnermi COP26 Glasgowimi saqqummiunneqarpoq. Isumaqatigiissummut ilanngunneq politikkikkut oqaluuserisanut pioreersunut naleqquppoq aamma 2030-mi 100 %-imik piujuartitsineq tunngavigalugu nukissiuteqarnissamut siunniunneqartumut, taanna Naalakkersuisut Nukissiuuteqarnermut Imermillu pilersuinermik Immikkoortumut pilersaarummi 2017-imeersumi saqqummiunneqarpoq.

“Parisimi isumaqatigiissummut ilanngunneq oqariartuutaavoq pingaaruteqartoq, tassa Kalaallit Nunaata imminut pilersornissaminik siunniussineranut uagut nammineq nukissiatsinnik, uuliamut nunanit allanit eqqussuunneqartumut taarsiullugu – tamanna Kalaallit Nunaannut aamma nunap pissusianut iluaqutaassaaq.” Nukissiorfinni pisortaaneq Kaspar Mondrup oqarpoq.

Piujuartitsineq tunngavigalugu allanngortitsiartorneq ingerlavoq

Nukissiamik tamanut pilersuinerup 70 %-ia ullumikkut ataavartumik nukissiornermit pivoq imermit nukissiorfinnit, seqernermit aamma anorisaatini illoqarfinni aamma nunaqarfinni. Piujuartitsinermik nukissiornermut nuukkiartorneq taamaattumik ingerlanneqareerpoq aamma siunissami ingerlassaaq. Nukissiorfinnit sulissutigineqarpoq illoqarfinni aamma nunaqarfinni tamani ataavartumik tunngaveqartumik nukissiuuteqarnissamut ilimanaatillit paasiniarneqarnissaat, tamannalu aqqutigalugu tamanut pilersuinermi piujuartitsineq tunngavigalugu nuunnissaq qulakkeerneqassaaq. 

Illoqarfinnik aamma nunaqarfinnik piujuartitsineq tunngavigalugu pilersuinerup saniatigut kalaallit ataavartumik nukissiorsinnaanermik ilimanaateqarnerata nunat tamalaat akornanni suleqatigiinnissaq pilersissinnaavaa, aningaasaliissuteqarneq aamma nukissiamik nunanut allanut nioqquteqarneq, tamanna inuiaqatigiit tamarmiusut ineriartornerannut iluaqutaassaaq. 

 ”Kalaallit Nunaata imermit nukissiorfiliornissamut ilimanaateqarnerata suliffissuaqarfinnut aamma aningaasaliissuteqarsinnaasunut tunngavissaqartitsivoq uagut aningaasaqarnitsinnut aamma inuiaqatigiinni annertusiartortitsinissamut iluaqutaasumik. Soorlu assersuutigalugu suliffeqarfiit nukissiamik annertuumik atuisut pilersorsinnaavagut imaluunniit nukissiaq orsussamut minguitsumut e-fuel-imut atorlugu (Power to X), tamatuma innaallagissiorfigut dieselimik ingerlatillit pilersorsinnaavai, silaannakkut angallannermi aamma umiarsuit ingerlaarnerannut atorneqarsinnaavoq aamma nunanut allanut nioqqutigineqarsinnaalluni. Periarfissat aamma ilimanaatillit annertulluinnartuupput.” Kaspar Mondrup naggasiivoq.