Sarfamik attaveerunnerit Nuummi, Nussuarmi Qinngorpumilu

Nalunaarut nal. 06:24, 02.12.2012

Unnuup ingerlanerani Nukissiorfiit Nordhavnimi ajutoortoqartillugu innaallagissiorfimmi atortut tamarmik aallartissimavaat, dieselilu atorlugu illoqarfik tamangajaat sarfamik pilersoqqilerlugu. Suli sumiiffiit amerlanngitsut sarfaqanngillat, assersuutigalugu umiarsualivitoqaq Qinngorput ilaa Fiskerbylu – taakku sukkanerpaamik sarfaqaqqilernissaat suliniutigaarput.
Nukissiorfimmi imermik nukissiorfiup aallarteqqinngikkallarnissaa aalajangersimavarput. Tassunga peqqutaavoq – ullumi qulimiguulik atorlugu misissuisoqarnerani paasineqarpat, Utoqqarmiut Kangerluarsunnguani innaallagiap aqqutaani ajoquteqartoq, tamanna sukkanerusumik pisariinnerusumillu aaqqinneqarsinnaassammat.

________________________________________________________________________________________________________________________________

Maannakkoqqissaaq atuisut amerlasuut sarfaqanngillat imermik pilersuivitsinni attaveeruttoqarnera peqqutaalluni. Atuisut pinngitsooratik pilersortariaqartut pingajorarterutaasa missai dieselimik pilersorneqarpoq taamaasillutillu sarfaqaannarlutik. Attaveqaatit, nerisassanik pilersuiviit annertunerit, politiit, Arktisk kommando, qatserisartoqarfik, utoqqaat illuat nuummiittoq, umiarsualivik Sikuki, Nuuk Centerilu. Atuisut sinneri attavineqqinnissaat erngertumik sulissutigaarput.