Utoqqarmiut Kangerluarsunnguanni imermit nukissiorfik ingerlaqqilerpoq

Nukissiorfiit sulisuisa tallimanngornerup ingerlanerani innaallagissamut sakkortuumut kabeli ajortissimasoq sapaatit akunnerata kingulliup ingerlanerani Nuummi innaallagissap qamittaarneranut patsisaasimasoq iluarsaatereerpaat.

“Immikkut ilisimasaqartutta nalilersimavaat kabelip iluarsaanneqarnissaa sapaatit akunnerini arlalinni ingerlanneqarsinnaassasoq, tamatumunnga pissutaallutik suliaqarnissamut atugassarititaasut taamarsuaq ajornakusoornerat, kisianni suliaqarneq aaqqissuulluagaq Nukissiorfiit aamma Air Greenlandip suleqatigiinnerisigut imatut inerneqarpoq, aaqqiinerugallartoq ullumikkut naammassineqarsinnaaneranik”, Nukissiorfiit pisortaanerat Kaspar Mondrup oqaluttuarpoq.

Tamatuma kingunerisaanik maannakkut Nuummi ajornartoornermi inissimajunnaarpugut Sarfaannguanit innaallagissiorfimmit sillimmataasumit pilersuinerup ingerlanneqarneranit, kiisalu innuttaasut aamma suliffeqarfiit soorlu tamatuma siornatigut sarfamik atueqqilersinnaalerlutik.

Piffissaq immikkut unamminartoq

Sapaatit akunnerata ingerlanerani oqaluuserinnittoqarpoq aamma allaaserinnittoqarpoq annertuumik, kiisalu Nukissiorfiit isornartorsiorneqarsimapput killiffik pillugu naammattumik ilisimatitsisannginnerarlugit.

“Pakatsinerit paasilluarsinnaavagut. Kisianni sarfaarunneq internetimi, tv-mi aamma radiumi  attaveqarnermik ajortitsinermik kinguneqarsimavoq. Naak Nukissiorfiit 24/7 (ulloq unnuarlu) attaveqaqatigiinnissamut piareersimasoqartuaraluartoq, tassanngaannit ingerlaavartumik killiffik paasissutissiissutigineqartarluni, taamaakkarluartorli piffissap ilaani paasissutissiinerit innuttaasunut apuunneqarsinnaasimanngillat.”

“Tamatumunnga ilutigitillugu Facebookimi tusatsiakkat aamma saqqummiunneqartut eqqunngitsut, ataatsimoortumik ilisimatitsinissamut suliassat oqinnerulersissimanngilaat,” Kaspar Mondrup oqaaseqaateqarpoq.

Ajornartoornermi innaallagissiorfik

Ilisimaneqartutut Nuummi innaallagissiorfiup sillimmataasup Nuuk ulluni unnuanilu kingullerni innaallagissamik pilersorpaa. Innaallagissiorfiup tamakkiisumik ingerlatsilersinnaanera ajornakusoorsimavoq taamaalilluni illoqarfik tamarmi pilersorneqarsinnaasimanani. Tamatumunnga arlalinnik pissuteqarpoq tassani tele aqqutigalugu attaveqarsinnaasinnaanerup amigaataanera pissutaanerulluni. Kisianni eqqunngilaq tamanna Nukissiorfiit ingerlaavartumik innaallagissiorfimmit sillimataasumik ingerlaavartumik misileraasannginneranik tamatuma pissuteqarnera. “Innaallagissiorfik sillimmataasoq qaammatit tamaasa aallarinneqartarpoq aamma misilittarneqartarluni, kisianni tamanna imatut isumaqanngilaq innaallagissiorfiup sillimmataasup illoqarfimmik pilersuinermut kisimi atorneqarnera. Taamatut ingerlatsinermik misilittaaneq taamaallaat ingerlanneqarsinnaavoq imermit nukissiornermit aamma dieseli atorlugu nukissiornermit nuussineq, tamatuma kingunerisussaavaa sarfap nalunaaquttap akunnerini arlalinni sivisussuseqartumik qamittoornera” Kaspar Mondrup nassuiaassivoq.

Innaallagissiorfik imermit nukissiorfiup sakkortussusiatut assinganik pilersuisinnaanngimmat Nukissiorfiit kajumissaarisimapput, innuttaasut aamma suliffeqarfiit sarfamik atuinermi pisariaqavissuunngitsumik atuinerminnik annikillisitseqqullugit. “Ilumut misigaarput kajumissaarineq tamanna tusarluarneqarsimasoq tamannalu illoqarfimmi takusinnaalluarsimavarput, juullip ulloriaat aappaluartut Nuummi juullimut ilisarnaataasut qaminneqarsimapput, tamannalu assut qujamasuutigivarput tassa Nuummi innuttaasut tamatumunnga atatillugu inuiaqatigiinnut akisussaassuseqarnerminnik takutitsimmata,” Kaspar Mondrup oqarpoq.

Suleqatigiilluarneq

Kalaallit Nunaanni upalungaarsimanermut Piareersimasut suleqatigineqarnerat pingaaruteqarsimavoq pitsaanerpaamik ataqatigiissaarinermut, iliuuserineqartut sammivilersornerannut aamma pitsaasuunerannut, tamakku ingerlaavartumik ingerlanneqarput tamatumuunakkut qulakkeerniarlugit inuiaqatigiinnut pingaaruteqartut ingerlanissaat. Suleqatigiinni allat ingerlatsisut suleqatigineqarnerisa qulakkeerpaat ingerlanneqartussat pisariaqartut pilertortumik aallartinneqarnerat – soorlu assersuutigalugu helikopteri atorlugu siullermik takusaaneq, paasissutissiinerit attuumassuteqartut innuttaasunut pilertortumik apuunnerat aamma piffissaq tamakkerlugu tassanerpiaq pisumi aammattaaq qanoq pisoqarsinnaaneranut iliuusissatut pilersaaruteqartoqarnera.

Nukissiorfinni sulisut annertuumik sulipput pisumi immikkorluinnaq aamma ajornartumik pisoqarnerai. “Ulloq unnuarlu sulipput aamma suut tamaasa atorlugit iliuuseqarput innuttaasunut tamanut pilersuinerup aalaakkaasup atuutilerseqqinneqarnissaanut,” Kaspar Mondrup oqarpoq. “Ataasinngormat unnukkulli sulineq ingerlassimasaat pingaaruteqarluinnartuusimavoq maannakkut nalinginnaasumik ingerlatsinermut uteqqinnitsinnut. Tamanna Nukissiorfiit sulisuinit immikkut illuinnartumik iliuuseqarneruvoq -  taamaattoqarsimanngikkaluarpat suli ajornerujussuarmik pisoqarsinnaagaluarpoq aamma nalinginnaasumik pilersuilernermut uteqqinnissatsinnut piffissaq sivisunerusoq ingerlasimassagaluarpoq. Tamanna pillugu ilissinnut qujanarujussuaq!” Kaspar Mondrup naggasiivoq.